Қазақстанда сайлаушылар тізімі жылына екі рет – 1 қаңтар мен 1 шілдеде жаңартылып отырады. Бұл туралы Орталық референдум комиссиясының мүшесі Шавхат Өтемісов мәлімдеді деп жазды ozgeris.info сайты.
Оның айтуынша, әрбір электоралдық науқан алдында тізімдерге қосымша тексеру жүргізіледі. Егер қате немесе нақты емес деректер анықталса, оларды тізімнен алып тастау бойынша шаралар қабылданады.
Комиссия төрағасы Нұрлан Әбдіровтің айтуынша, әкімдіктер мемлекеттік жеке тұлғалар базасының негізінде жаңартылған сайлаушылар тізімін учаскелік комиссияларға ұсынады.
Оның сөзінше, әкімдіктер де тізімдерді жылына екі рет және сайлау науқаны жарияланғанға дейін тексеріп отырады.
«Сондықтан сайлаушылар тізімінде “өлі жандар” бар деген пікір негізсіз. Орталық референдум комиссиясының да, аумақтық және учаскелік комиссиялардың да тізімге жалған адамдарды енгізу туралы ойы жоқ», – деді Нұрлан Әбдіров.
Айта кетейік, жаңа Конституция жобасы бойынша референдум 15 наурызда өтеді. Оған 12 миллионнан астам сайлаушы қатыса алады.
