Оңтүстік Кореяның Қазақстандағы елшісі Чжон Кихон Жетісу облысының Үштөбе қаласында әлеуметтік осал отбасыларға жылу жабдықтарын тапсыру рәсіміне қатысты, деп хабарлайды Ozgeris.info.
Жоба Корея елшілігі, Good Neighbors ұйымы және KOTRA Алматы өкілдігінің бастамасымен, Shinhan Bank, KT&G және KyungDong Navien компанияларының қолдауымен жүзеге асырылып отыр. Оның аясында аз қамтылған және әлеуметтік осал отбасылардың үйлерін газ жүйесіне қосу, газ қазандықтары мен энергия үнемдейтін жылыту жабдықтарын орнату көзделген.
2025 жылы жоба аясында 25 отбасы көмек алса, 2026 жылы қолдау көрсетілетін отбасылар саны 50-ге жеткізілген. Олардың қатарында корей ұлтының өкілдерімен бірге Үштөбедегі басқа да әлеуметтік осал отбасылар бар.
Елші Чжон Кихонның айтуынша, жоба тек жылу жабдықтарын берумен шектелмейді. «Бұл – Үштөбе тұрғындарының, оның ішінде Қазақстан корейлерінің қысты жылы әрі қауіпсіз жағдайда өткізуіне деген қолдауымыздың көрінісі», – деді ол.
Үштөбе – 1937 жылы Кеңес Одағының Қиыр Шығысынан күштеп көшірілген корейлер алғаш қоныстанған тарихи орындардың бірі. Сол кезеңде корейлер ауыр жағдайда жеркепелер салып, қатал қысты бастан өткерген. Қазір қаладағы кейбір ескі үйлер көмірмен жылытылады.
Іс-шара барысында Good Neighbors ұйымы мен Қаратал ауданы әкімдігі өзара түсіністік туралы меморандумға қол қойды. Құжат әлеуметтік жауапкершілік саласындағы ынтымақтастықты дамытуға және кейінгі жобаларды жүзеге асыруға негіз болмақ.
2027 жылы Үштөбеде корейлердің қоныстанғанына 90 жыл толады. Осыған орай Оңтүстік Корея елшілігі Қазақстандағы корей қауымдастығымен және жергілікті қоғамдастықтармен байланысты одан әрі нығайтуды жоспарлап отыр.
