Астана мен оның маңындағы елді мекендерді байланыстыратын ауқымды көлік жобасына қатысты жаңа деректер белгілі болды. LRT желісінің Қосшы қаласына дейінгі екінші кезеңі келесі жылдың соңына қарай аяқталуы мүмкін деп хабарлайды ozgeris.info сайты.
City Transportation Systems (CTS) басқарма төрағасы Асылбек Дүйсебаев Астанадан Қосшы қаласына қарай созылатын LRT желісінің екінші кезеңіне қатысты жоспарлармен бөлісті. Оның айтуынша, жобаның тағдыры тікелей қаржыландыру мәселесіне байланысты.
Технологиялық тұрғыдан алғанда, жобаны 2027 жылдың соңына қарай толық аяқтауға мүмкіндік бар. Қазіргі уақытта CTS басшылығы қаржы құрылымдарымен келіссөздер жүргізуде.
«Инвесторлар тарапынан қызығушылық өте жоғары. Бұл мәселе оң шешімін табады деп ойлаймын. Егер қаржыландыру дер кезінде шешілсе, біз жобаны келесі жылдың соңында бітіре аламыз», — деді Асылбек Дүйсебаев баспасөз мәслихатында.
Бұл бағыттағы жұмыстарды LRT-ның бірінші кезеңін салған қытайлық компания жүргізеді. Қаржыландыру мәселесі толық шешілгенше, мердігер компания құрылыс жұмыстарын өз қаражаты есебінен жалғастыра бермек.
Бұл желінің іске қосылуы Астана мен Қосшы арасындағы көлік қатынасын едәуір жеңілдетіп, тас жолдағы кептелісті азайтуға септігін тигізеді деп күтілуде.
