"Лаңкестермен соғысқа шақырған": Ақтөбе тұрғыны үйінде қару-жарақ сақтаған

Енді Ақтөбе мен Қаскелең қаласында терроризмді насихаттаған қос тұрғын 9 жыл бас бостандығынан айырылып отыр, деп хабарлайды ozgeris.info сайты. Ұлттық қауіпсіздік қызметі ақтөбелік ер адамның жан-жағындағыларды лаңкестер жағында шетелдегі соғысқа қатысуға шақырып, өзі де оларға қосылуды жоспарлағанын анықтаған. Тінту барысында күдіктіден 2 автомат, 8 тапанша, 8 мылтық, 3 шолақ қару, жасырын тасымалданатын гарнитурасымен 6 радиостанция, 3 түтін шашкасы, 1 жарық гранатасы және 581 патроны табылған. Сондай-ақ, Қаскелең тұрғыны терроризмді насихаттағаны және террористік әрекеттерді ұйымдастыруға адамдарды шақырғаны үшін 9 жылға сотталды. Фигурант Қазақстанда резонансты зорлық-зомбылық акциясын жасау үшін лаңкестік топ құруды жоспарлаған. Осы мақсатпен басқа діндар адамдарға лаңкестік идеологияны сіңіріп, оларды өз қатарына тартуға әрекет еткен.

– Осы жылдың басынан ҰҚК тергеген қылмыстық істер бойынша террористік және экстремистік қылмыстар жасағаны үшін әртүрлі мерзімге 34 адам, сондай-ақ 2 шетел азаматы сотталған. Олар терроризмді насихаттағаны, діни араздық тудырғандығы, террористік және экстремистік топтардың әрекетіне тартқаны, құрғаны және оларға қатысқаны, тыйым салынған ұйымдардың әрекетіне қатысқаны үшін кінәлі деп танылған, – деп мәлімдеді ҰҚК.

Қазіргі уақытта тағы 23 адамға қатысты тергеу жалғасып жатқан көрінеді.