Әлемдегі ешбір елде жоқ ерекше ақша пайда болды. Беларусь республикасы Жеңістің 80 жылдығына орай номиналы 80 рубль болатын банкнотаны айналымға шығарды. Бұл бірегей банкнота өзге елдерде қабылданған дәстүрлі номиналдардан ерекшеленеді. Әдетте, орталық банктер 1, 5, 10, 20, 50, 100, 200 рубль сияқты қалыпты номиналдарды басып шығарады. Ал Беларусь бұл дәстүрді бұзып, өзіне тән жаңа жолды таңдады, деп хабарлайды Ozgeris.info.
Беларусьтың жаңа банкнотасы «80 жыл – Ұлы Жеңіс» деген тарихи тақырыпты ұстанады. Оның дизайны мен безендірілуі де осы оқиғаға арналды. Банкнотаның алдыңғы бетінде тарихи және мәдени нысандар бейнеленген. Оның ішінде Брест қамалының “Ерлік” монументі – Беларусь халқының қаһармандығының символы, “Отан-Ана” скульптурасы – бейбітшіліктің және ұрпақтар сабақтастығының белгісі бар.
Сыртқы жағында ұлттық ою-өрнек аясында ана мен баланың қол ұстасқан бейнесі салынған. Бұл сурет өмірдің мәңгілік жалғасын, бейбітшілік пен болашаққа деген үмітті бейнелейді. Сондай-ақ, Минск қақпасы, алма гүлі және ұшып жүрген ләйлектер көрініс тапқан.
Беларусьтің жеңістің 80 жылдығына арнап шығарған монеталары да назар аударарлық. Ең қызығы – бұл монеталарды Қазақстанның өзіміздің Ұлттық банкке қарасты «Қазақстан теңге сарайы» жасаған. Яғни, көршіміздің ерекше ақшасы Қазақстанда басылып шықты.
Бұл коллекциялық монеталар екі нұсқада шығарылды:
•925 сынамадағы күміс монета – номиналы 20 рубль, салмағы 67,26 грамм, таралымы 2 500 дана.
•Мысты-никель монета – номиналы 1 рубль, салмағы 57 грамм, таралымы 5 000 дана.
Күміс монетаның бетінде Беларусь Республикасының елтаңбасы бейнеленген. Ал сыртқы жағында әскери техникалар, қару-жарақ және қып-қызыл үш қалампыр-гвоздика гүлі кескінделген. Беларусьтің ерекше банкнота мен монеталарын басқа елдердің ақша белгілерінен ажырататын басты ерекшелік – олардың номиналы. 80 рубль – бұл сан Жеңістің 80 жылдығын символдайды. Беларусь осылайша Ұлы Отан соғысында жеңіске жеткен халықтың ерлігін ұлықтайды. Әдетте, орталық банктер дөңгелек номиналдарды (1, 5, 10, 50, 100) таңдайды. Бірақ Беларусь бұл дәстүрден бас тартып, символдық мәні бар санды таңдады.
