Көкшетау қалалық сотында жаяу жүргіншіні қағып өлтірген әйелге қатысты қылмыстық іс қаралды. Жол апатын жасаған азаматша көлік рөліне жүргізуші куәлігінсіз отырғаны анықталды, деп хабарлайды ozgeris.info сайты.
Сот отырысы барысында айыпталушы мұндай қауіпті қадамға неліктен барғанын түсіндірді. Оның айтуынша, сол күні көліктің заңды иесі саналатын күйеуінің кенеттен денсаулығы сыр беріп, жағдайы нашарлаған. Сол себепті ол амалсыздан көлікті өзі жүргізуге мәжбүр болған. Айта кетейік, жүргізуші куәлігі жоқ адамға көлік тізгінін табыстағаны үшін оның күйеуіне қатысты іс бөлек өндіріске алынды.
Сот үкім шығару кезінде бірқатар жеңілдететін мән-жайды назарға алды. Азаматша жасаған ісіне шын жүректен өкініп, кінәсін толық мойындаған. Оның асырауында кәмелетке толмаған екі кішкентай баласы бар. Бұған қоса, ол жәбірленушілерге келтірілген моралдық шығынды өз еркімен өтеп берген және бұрын-соңды ешқандай қылмыстық немесе әкімшілік жауапкершілікке тартылмаған.
Жәбірленуші тарап та сотта сөз сөйлеп, ешқандай материалдық немесе моралдық шағымы жоқ екенін мәлімдеді. Олар судьядан айыпталушыны бас бостандығынан айырмауды сұрады.
Осы жағдайлардың барлығын ескере отырып, сот әйелге 2 жыл 6 айға бас бостандығынан айыру жазасын тағайындады. Алайда оның тәрбиесінде екі кішкентай баласының болуына байланысты жазаны өтеу мерзімі 3 жылға кейінге қалдырылды.
