Келесі жылы педагогтардың жалақысы 2 есе өседі – вице-министр

ҚР Еңбек және халықты әлеуметтік қорғау вице-министрі Ержан Біржанов ҚР Президенті жанындағы Орталық коммуникациялар қызметінде өткен брифингте Мемлекет басшысының қазақстандықтардың табысын арттыру және жұмыспен қамтуды қамтамасыз ету жөніндегі тапсырмаларын іске асыру туралы айтты, деп хабарлайды ozgeris.info ведомствоның баспасөз қызметіне сілтеме жасап. Вице-министр сөз басында Мемлекет басшысының Үкімет алдына қойған міндеттерін еске салды, оларды іске асыруға ҚР Еңбек және халықты әлеуметтік қорғау министрлігі толық немесе ішінара жауап береді. Біріншісі – «Жастар практикасы» және «Алғашқы жұмыс орны» жобалары бойынша қатысу кезеңін ұзарту мен жалақысын арттыру, сондай-ақ бизнес-идеяларды дамыту үшін гранттар мөлшерін 400 АЕК-ке дейін ұлғайту. Екінші – Халықтың табысын арттыру бағдарламасын әзірлеу және қабылдау. Үшінші – өңірлерде жыл сайын 10 мың тұрғынға 100 жұмыс орнын құру. Бұл халық санының өсуін ескере отырып, 2025 жылға дейін негізінен жеке секторда 780 мыңнан астам жұмыс орнын құрайды.

«Президенттің тапсырмасы бойынша 2020 жылдан бастап педагогтардың, 2021 жылдан бастап медициналық және әлеуметтік қызметкерлердің жалақысын кезең-кезеңімен арттыру басталды, нәтижесінде 2023 жылға қарай олардың жалақысы 2 есеге артады. Ал 2022 жылдың 1 қаңтарынан бастап ЕТЖ мөлшері 41% - ға, 42 500-ден 60 000 теңгеге дейін ұлғайды, бұл шамамен 1 млн 650 мың жалдамалы жұмыскердің ақшалай табыстарының өсуіне алып келді», – деп қосты ол.