Алматыдағы электр желілерінде болған апаттан кейін оның себептерін анықтау және мұндай жағдайдың қайталануына жол бермеу үшін мемлекеттік комиссия құрылды. Бұл туралы Үкімет отырысында Энергетика министрі Ерлан Ақкенженов мәлімдеді, деп хабарлайды Ozgeris.info.
Министрдің айтуынша, оңтүстік өңірлердегі электр энергиясының тапшылығын ескере отырып, жаңа генерациялаушы қуаттарды кезең-кезеңімен іске қосу жалғасады. Атап айтқанда, Алматыдағы ЖЭО-2 мен ЖЭО-3, сондай-ақ Түркістан облысында қуаты 1000 МВт болатын жаңа бу-газ қондырғысын іске қосу жоспарланған.
Сонымен қатар оңтүстік өңірлердің электрмен жабдықтау тұрақтылығын арттыру үшін Шымкент – Жамбыл – Шу бағыты бойынша кернеуі 500 кВ болатын жаңа электр беру желісі салынып жатыр. Жобаның аяқталуы 2027 жылдың екінші тоқсанына жоспарланған. Қазір құрылыс жұмыстарының шамамен 50%-ы орындалған.
Ерлан Ақкенженовтің сөзінше, апаттан кейін құрылған мемлекеттік комиссия бірнеше күн ішінде қосымша ұйымдастырушылық шараларды ұсынады.
Айта кетейік, 20 тамыз күні кешке Алматының Алмалы және Жетісу аудандарында электр энергиясы апатты түрде өшіп қалған. Бұған дейін, 14 тамызда Алматыда өтуі тиіс әлемдік жұлдыз Канье Уэстің концерті жарық мәселесіне байланысты келесі күнге шегерілген болатын.
