Жаңа адамдар қозғалысы дүкендерде мерзімі өткен тауарлардың сатылуына қарсы күресті жалғастырып жатыр. «Время истекло» азаматтық науқаны Алматы, Тараз, Талдықорған, Түркістан, Өскемен секілді бірқатар қалада өтуде. Белсенділердің пікірінше, бұл — қоғамның талқылауын және тұрғындардың белсенді араласуын қажет ететін жүйелі мәселе.
Шымкентте науқан аясында Иляев көшесі, 86 мекенжайындағы «Turan» дүкеніне тексеру жүргізілді. Нәтижесінде жартылай фабрикаттар мен балалар тағамын қоса алғанда, мерзімі өтіп кеткен көптеген өнім анықталды. Әкімшілік оларды сатудан алып тастауға уәде бергенімен, қайта бақылау кезінде тауарлардың сөрелерде тұрғаны белгілі болды.
Тексеру қорытындысында жарамсыз өнімдер арнайы арт-нысан — мерзімі өткен тағамды жейтін алып құрт арқылы жойылды. Дүкен өкілдері белсенділерге қарсылық білдіруге тырысқан. Алайда Жаңа адамдар қозғалысы қоғам мүддесін қорғайтынын айтып, «солай да жарайды» деген көзқарастан бас тартуға үндеді.
Қозғалыс өкілдерінің айтуынша, мұндай бейжайлық жауапсыздықты қалыптастырады: сатушы сатып алушыны табыс көзі ретінде ғана қабылдай бастайды. Бұл сенімге сызат түсіріп, жауапкершілікті әлсіретеді.
Жаңа адамдар қозғалысының өкілі Бекдаулет Ниятула сатып алушының қауіпсіздігі мен құқығы басымдықта болуы тиіс екенін атап өтті. Оның сөзінше, Шымкентте және өзге қалаларда тексерулер жалғасады, ал заңбұзушылықтар қайталанса, тиісті қоғамдық шаралар қолға алынады.
