Қазақстан азаматы көршілес Қырғызстан аумағында қолға түсіп отанына экстрадицияланды. Ол қарапайым халық пен екінші деңгейлі банктердің қыруар қаржысын жымқырды деген күдікке ілініп отыр. Қазіргі уақытта ұсталған азамат тергеу изоляторына жабылды, деп хабарлайды ozgeris.info сайты.
Бас прокуратураның бастамасымен әшкере болған қылмыстық топ үш адамнан құралған. Олар екі мың жиырма екінші жылдан екі мың жиырма төртінші жылға дейін қайтарылмайтын автонесиелерді рәсімдеумен айналысқан. Алаяқтар тұрғындарды алдап шақырып олардың атына көлік сатып алуға қарыз алған. Кейін темір тұлпарларды сатып түскен пайданы өз қалталарына басып отырған.
Бұдан бөлек топ мүшелері мүлдем жоқ көліктерді Алматы қаласындағы мамандандырылған халыққа қызмет көрсету орталығында заңсыз тіркеуден өткізген. Жалған құжатта ол машиналар Қырғызстаннан әкелінді деп жазылған. Осыдан соң әлгі жоқ көліктерді сатып алу үшін үшінші тұлғалар арқылы банктерден қомақты несие рәсімдеген.
Оңай табылған қаражатты ұрылар тек өз қажеттіліктеріне жұмсаған. Кешенді тергеу барысында екі банк пен жетпіс жеті жәбірленушіге жалпы көлемі 1,8 миллиард теңгеден астам шығын келгені анықталды.
Қазіргі таңда қылмыстық топтың екі мүшесіне қатысты тергеу толық аяқталып іс сотқа жолданды. Ал үшінші сыбайлас жауапкершіліктен жалтарып қашып кеткен еді. Жедел іздеу шараларының нәтижесінде ол Қырғыз жерінде табылды. Құзырлы органның арнайы сұрауымен ол елге қайтарылып тиісті жазасын тартатын болады.
