Қарағандыда осыдан бірнеше ай бұрын жұмбақ жағдайда көз жұмған 29 жастағы Эльмира Қошқарбаеваның ісі қайта жанданды. Бастапқыда келіншекті көмірқышқыл газынан уланып қайтыс болды деп жапқан еді. Алайда марқұмның жолдасы Нұрсұлтан Қошқарбаев бұл тұжырыммен үзілді-кесілді келіспейді. Ол сүйіктісінің қасақана өлтірілгеніне әрі зорланғанына бек сенімді, деп хабарлайды ozgeris.info сайты.
Қайғылы жағдай 2026 жылдың 13 сәуірінде тіркелді. Кешкі уақытта Киров полиция бөліміне 21-шағынаудан аумағындағы гараждардың бірінен әйел адамның мәйіті табылғаны туралы хабарлама түседі. Тәртіп сақшылары жабық гараж ішінде тұрған "Mazda 626" көлігінің артқы орындығынан Эльмираның денесін тапқан. Дереу қылмыстық өндіріс тіркеліп сот-медициналық сараптама тағайындалады. Бастапқы тергеу амалдары жүргізілгенімен іс жазатайым оқиға ретінде қаралды.
Бұл істегі басты куәгер марқұмның "К" есімді әріптесі болды. Ер адам тергеушілерге берген жауабында сол күні гаражда көлігін жөндеп жатқанын жеткізген. Кейін Эльмираға жұмыс бабымен қоңырау шалып артынша демалуға шақырады. Әйел келісімін беріп екеуі ішімдік ішкен. Содан соң гараж ішіндегі темір тұлпарға кіреді. Ер адам қақпаны ішінен құлыптап алған. Қозғалтқышы қосулы тұрған көлік ішінде олар өз еріктерімен жыныстық қатынасқа түседі. Бұдан кейін куәгер жүргізуші орындығына жайғасып қозғалтқышты сөндіріп ұйықтап қалған. Кешкі сағат сегіз жарым шамасында оянған ол жанындағы әйелдің жан тәсілім еткенін байқайды. Оны есіне түсірмек болып әлектенеді. Еш нәтиже шықпаған соң туыстарына хабар беріп полиция шақыртқан. Ер кісі ешқандай қылмыстық пиғылы болмағанын нақтылады.
Сот-медициналық сараптаманың қорытындысы өлімнің басты себебі ретінде көміртегі тотығынан жедел улануды көрсетті. Қан құрамындағы карбоксигемоглобин деңгейі 59,55 пайызға жеткен. Мамандар мұны өлімге әкелетін мөлшер деп бағалады. Сонымен қатар марқұмның қанынан 0,43 промилле этил спирті табылған. Бұл ішімдіктің болмашы ғана әсерін білдіреді. Сарапшылар мәйітті тексеру кезінде самай мен бет сүйегі тұсында, арқасында доға тәрізді сыдырылған іздер байқаған. Сол жақ иығы көгеріп екі тізесі қажалған және бірнеше жолақ жарақаттар табылған. Отбасы ұсынған суреттерде бұл жарақаттар анық көрінеді. Мамандар бұл соққылар адамның тірі кезінде алынғанын растады. Бірақ олардың қазаға тікелей қатысы жоқ деп шешім шығарған.
Марқұмның күйеуі тергеу жұмыстарының өте салғырт жүргізілгеніне ашынады. Қайғылы оқиға болған күні сағат 18:20 шамасында балабақша тәрбиешісі хабарласып қызды ешкім алып кетпегенін ескерткен. Әдетте бұл міндетті анасы атқаратын. Осы қоңыраудан кейін отағасы әйелін іздеуге кіріседі. Эльмира ешқашан балабақшадан кешікпейтін бөгелетін болса алдын ала міндетті түрде ескертетін. Отағасы жауапты әрі тиянақты әйелдің жұмыстан соң өз еркімен гаражға барып арақ ішкеніне мүлдем сенбейді. Анасы балалары мен әріптестерінің алдына ішімдік иісімен баруға ешқашан жол бермес еді.
Жерлеу рәсімі алдында мәйітті қарап шыққан таныс дәрігер қол-аяқтың сыну белгілерін байқаған. Одан бөлек жыныс мүшелерінің айналасында гематома табылған. Ең күдіктісі келіншектің ішкиімі жоғалып кеткен. Киімдерінің бір бөлігі, шұлығы мен мойнындағы алқасы қайтарылмады. Ал берілген заттардан кір жуатын ұнтақтың иісі мүңкіп тұрған. Денесіндегі көптеген жарақаттар мен сынық белгілеріне тергеушілер неге бірден назар аудармады деген сұрақ жолдасына тыныштық бермейді.
Іс материалдарында жауапсыз қалған сауалдар өте көп. Телефон қоңырауларының бөлшектері мен хабарламалар тексерілмеген. Марқұмның гаражға келгенін растайтын бейнежазбалар істе атымен жоқ. Оқиға орнында болған ер адамнан қажетті сараптамалар алынбапты. Көліктің ішінен биологиялық іздер мүлдем ізделмеген. Осы уақыт аралығында істі жүргізетін тергеуші төрт рет ауысқан. Әйелді апарған такси жүргізушісі де табылмады. Құқық қорғаушылар тек күдіктінің жауабына сүйеніп шешім қабылдай салған.
Қазіргі таңда қылмыстық іс қайта жанданды. Тәртіп сақшылары куәгерлерден, туыстарынан және жолдасынан қайта жауап алып жатыр. Әзірге құқық қорғау органдары тарапынан нақты қорытынды жасалған жоқ. Басылым тілшісі Қарағанды облысының полиция департаментіне сауал жолдағанымен әзірге ресми жауап келмеді. Жанұяда ешқандай үлкен ұрыс-керіс болмаған тату-тәтті өмір сүрген отбасының шырқы бұзылды. Екі кішкентай бала ана мейірімінен ерте айырылды. Нұрсұлтан Қошқарбаев бұл істің ақ-қарасын ажырату үшін Қарағанды облыстық және Бас прокуратураға шағым түсірмек. Ол ешкімді алдын ала айыптамайды тек жан-жақты әрі әділ тергеуді талап етіп отыр. Жаңалықтағы деректерді растау мақсатында elmira_koshkarbaeva_9611 инстаграм парақшасындағы отбасылық фотосуреттер де іске тіркелді.
