Иманғали Тасмағамбетов НАТО-ның Беларусь немесе Ресейге ықтимал басып кіруін "ақылға қонымсыз" деп бағалайды.
Дегенмен Солтүстікатлантикалық альянс белсенділігінің артуы кез келген сценарийдің ықтималдылығын көрсетеді.
Бұл туралы Sputnik баспасөз орталығында өткен бейнеконференция барысында
ҰҚШҰ бас хатшысы Иманғали Тасмағамбетов мәлімдеді. Оның айтуынша, Ұжымдық қауіпсіздік шарты ұйымы (ҰҚШҰ) өзінің жауапкершілік аймағының Шығыс Еуропа бөлігіндегі жағдайды мұқият қадағалап отыр.
"Біз НАТО-ның Беларусь пен Ресейдің батыс шекарасына дейін шабуылдау инфрақұрылымын ілгерілетуін, әскери белсенділіктің артқанын көріп отырмыз. Жалпы алғанда қазіргі геосаяси тұрақсыздық ешбір сценарийді жоққа шығара алмайды", - деді Иманғали Тасмағамбетов.
Ол бұл шараларға жауап ретінде Ресей өзінің ядролық доктринасын өзгерткенін еске салды.
"Қазіргі уақытта әлемде теңдесі жоқ "Орешник" гипердыбыстық қаруының жауынгерлік жағдайдағы сынақтарын әлеуетті қарсыластар елеусіз қалдыра алмайды", - деді ҰҚШҰ Бас хатшысы.
ҰҚШҰ қызметінің басқа да тақырыптарына тоқталған Иманғали Тасмағамбетов ұжымдық қауіпсіздік шарты ұйымына қатысушы елдерді заманауи қару-жарақпен және техникамен жабдықтау жұмыстары қарқынды жүріп жатқанын айтты.
Оның пікірінше, әскери-техникалық ынтымақтастық жалғасуда, ал Ресейдің әскери-өнеркәсіптік кешені өте белсенді және тиімді жұмыс істеп жатыр. ҰҚШҰ елдеріне қару-жарақ пен әскери техниканы жеткізу негізінен Ресей мен осы елдер арасындағы екіжақты ынтымақтастық аясында орындалып жатыр.
"ҰҚШҰ-ның барлық елі "Ресейқорғанысэкспортпен" тікелей жұмыс істейді. Басты мәселелердің бірі – ҰҚШҰ елдерінің қаруды ішкі бағамен сатып алу мүмкіндігі бар. Бұл жұмыс қызу жалғасып жатыр", – деді Иманғали Тасмағамбетов.
Ол ҰҚШҰ аясында шартқа қатысушы елдердің ұжымдық қарулы күштерін заманауи және озық қару-жарақпен және әскери техникамен жабдықтау мәселелері тікелей талқыланып жатқанын тағы да айтты.
