14 қарашада Freedom холдингінің басшысы Тимур Турлов Ресейде Freedom Bank карталарының берілуіне қатысты Ұлттық банктің тексеруі жайлы сұраққа жауап беріп, бұл процесс «заң талаптарына толық сәйкес келеді» деді. Ол журналистерді «сенсация іздемей, процестерді мұқият зерттеуге» шақырды деп хабарлайды Оzgeris.info сайты National Business Kazakhstan сайтына сілтеме жасап.
Алайда NBK екі ай бұрын Ресей тұрғынына Freedom картасын Қазақстанға келмей, ИИН алмай, келісімшарт жасамай рәсімдеп көру үшін эксперимент жүргізген. Нәтижесінде виртуалды да, пластик карта да еш қиындықсыз дайындалған. Карта брокерлік шотқа тіркелгенімен, төлем картасы сияқты толық жұмыс істейді.
Freedom ресми жауабында бұл карталар мемлекеттік eResidency бағдарламасы аясында беріледі деп түсіндірген. Бірақ NBK салыстырған кезде eResidency талаптары (ИИН, eSIM, банк шоты, Digital ID алу) Freedom картасын алу талаптарымен сәйкес келмейтіні анықталды. Баға да басқаша: Freedom картасы 250 доллар болса, eResidency жылына 500 доллар.
eResidency жобасының өкілдері бағдарламаның әлі тестілеу кезеңінде екенін айтып, алғашқы электронды резидент тек 2025 жылдың қарашасында тіркелгенін хабарлады. Ал Freedom карталары Ресей азаматтарына бұдан әлдеқайда бұрын беріліп келген. Делдал сервистер мұндай картаны қашықтан рәсімдеуді мыңдаған адамға ұсынған.
Сарапшылардың бір бөлігі Қазақстан банктері санкциялық тәуекелге тап болуы мүмкін екенін ескертеді. Олар Freedom-нің әрекеті халықаралық санкцияларды айналып өтуге мүмкіндік береді деп санайды. Корреспонденттік шоттардың жабылуы немесе жаңа санкциялар қаупі бар екенін айтады.
Ал eResidency жобасының басшылығы тәуекелдер аса жоғары емес деп есептейді, себебі санкциялық бақылау қатаң және жеке тұлғалар арқылы санкциялық тауар алу қиын.
NBK бұл мәселеге қатысты нақты пікір алу үшін ЕО-ның санкциялар жөніндегі өкіліне сұрақ жолдады.
