2028 жылғы футболдан Еуропа чемпионаты 9 маусым мен 9 шілде аралығында өтеді. Құрлықтық додаға Англия, Шотландия, Уэльс, Солтүстік Ирландия және Ирландия бірлесіп қонақжайлық жасайды. Турнирдің ашылу матчы Кардифф қаласында ұйымдастырылса, финал Лондондағы әйгілі «Уэмбли» стадионында өтеді, деп хабарлайды Ozgeris.info
Еуропа чемпионатының іріктеу кезеңіне қатысты маңызды күндердің бірі – 2026 жылғы 6 желтоқсан. Дәл осы күні Солтүстік Ирландияның астанасы Белфастта іріктеу жеребесі тартылады. Оның қорытындысы бойынша ұлттық құрамалар Еуро-2028 жолындағы қарсыластарын анықтайды.
Еуро-2028 қай елдерде өтеді?
УЕФА атқарушы комитеті 2023 жылғы 10 қазанда 2028 жылғы Еуропа чемпионатын Ұлыбритания құрамындағы төрт елде және Ирландияда өткізу туралы шешім қабылдады.
Турнир Англия, Шотландия, Уэльс, Солтүстік Ирландия және Ирландияның тоғыз стадионында ұйымдастырылады. Матчтарды қабылдайтын қалалар мен ареналар:
* Бирмингем – «Вилла Парк»;
* Глазго – «Хэмпден Парк»;
* Дублин – «Дублин Арена»;
* Кардифф – Уэльс ұлттық стадионы;
* Ливерпуль – «Эвертон Стэдиум»;
* Лондон – «Тоттенхэм Хотспур Стэдиум»;
* Лондон – «Уэмбли»;
* Манчестер – «Манчестер Сити Стэдиум»;
* Ньюкасл – «Сент-Джеймс Парк».
Еуро-2028-дің ашылу матчы Кардиффте өтеді. Ал чемпионның есімі 9 шілдеде Лондондағы «Уэмбли» стадионында белгілі болады.
Турнир форматы өзгере ме?
Еуропа чемпионатының финалдық кезеңінде 24 ұлттық құрама бақ сынайды. Командалар алты топқа бөлініп, әр топта төрт құрама өзара ойнайды. Топтық кезеңнің қорытындысы бойынша әр топтың алғашқы екі орнын иеленген командалар плей-оффқа шығады. Сондай-ақ үшінші орын алған құрамалардың ішіндегі ең үздік төрт команда жарысты жалғастырады.
Одан кейінгі кезеңде командалар бір ойыннан тұратын жолдама үшін таласады. Плей-офф 1/8 финалдан басталып, ширек финал, жартылай финал және финалмен аяқталады.
Еуро-2028 іріктеуі қашан басталады?
Іріктеу турнирі 2027 жылғы наурызда басталып, сол жылдың қарашасында аяқталады деп жоспарланған. Құрамалар 12 топқа бөлініп, әр топта төрт немесе бес командадан болады. Ұлттық құрамалар қарсыластарымен өз алаңында және сырт алаңда кездеседі.
Іріктеу қорытындысы бойынша бірқатар команда Еуропа чемпионатына тікелей жолдама алады. Қалған орындардың иелері іріктеу нәтижелері мен УЕФА Ұлттар лигасындағы көрсеткіштер ескерілетін тәртіп бойынша анықталады.
Қосымша жолдамаларға таласатын құрамалар 2028 жылғы наурызда өтетін плей-офф матчтарында ойнайды. Осы ойындардан кейін Еуро-2028 финалдық кезеңіне қатысатын командалардың толық тізімі белгілі болады.
Іріктеу жеребесі қашан тартылады?
Еуро-2028 іріктеу кезеңінің жеребесі 2026 жылғы 6 желтоқсанда Белфаст қаласында тартылады. Ұлттық құрамалар өз топтарындағы қарсыластарын біліп, Еуропа чемпионатына шығу жолындағы дайындық жоспарын нақтылай алады.
Жеребе қорытындысы командалардың іріктеу науқанындағы мүмкіндіктерін бағалауға мүмкіндік береді. Ал 2027 жылғы наурызда басталатын кездесулер Еуро-2028 финалдық кезеңіне баратын жолдағы шешуші сынақ болмақ. Футбол жанкүйерлері үшін алдағы екі жылда ұлттық құрамалардың іріктеу ойындары мен құрлықтық доданың дайындығы басты назарда болады.
