Торғай өңірінде туып, кейін шетел асқан Жәнібектің (Jani Saveliev) өміріне қатысты тың дерек шықты. "Қазақ радиосына" сілтеме жасаған ozgeris.info басылымы жігіттің туған анасы болуы ықтимал әйел туралы жазды.
Редакция поштасына келген арнайы хаттағы мәліметтер отандасымыздың бұған дейінгі өмірбаянымен толық үйлеседі.
Хатты жазған адам баланы тастап кеткен келіншек өзінің қайын әпкесі екенін жеткізген. Оқиға желісіне қарағанда 2002 жылы бір бойжеткен Моңғолиядан Арқалық қаласына білім алуға келеді. Ол аяқасты жүкті болып қалып, бұл жағдайды ата-анасына естіртуге қатты қорқады. Ақыры перзентханада босанып, нәрестеден бас тартатыны туралы ресми қолхат жазып қалдырған.
Хат иесі Жәнібектің дәл сол тастанды сәби екеніне бек сенімді. Екі жақтың да туған күндері дәлме-дәл келіп тұр. Оған қоса ұлын іздеген әйел шетелдік жігіттің өзіне аумағандай ұқсайтынын байқаған. Осы жайттардың ақ-қарасын ажырату үшін мұқият әрі нақты тексеріс керек.
Жұмбақтың түйінін шешу мақсатында туысы ДНҚ сараптамасын тапсыруға толықтай дайын екенін мәлімдеді. Бұл медициналық зерттеу Жәнібек пен келіншектің арасындағы биологиялық байланысты нақты анықтап бермек.
