БҰҰ қарарын КАЗГЮУ Университетінде талқыланды

БҰҰ Қауіпсіздік Кеңесінің қауіпсіздік пен бейбітшілікті қамтамасыз ету жөніндегі 1325 қарарын іске асырудағы және бүгінгі күні аса өзекті болып табылатын жанжалдардың алдын алу мен реттеуге әйелдердің тең құқылы және жан-жақты қатысуы жөніндегі әйелдердің рөлі талқыланды деп хабарлайды «ozgeris.info».   3 наурыз күні М.С. Нәрікбаев атындағы КАЗГЮУ Университетінде «Әйелдер көшбасшылығы байқуатты мемлекеттің негізі» тақырыбында дөңгелек үстел өткізді. Іс-шара барысында мемлекеттік басқару, корпоративтік және азаматтық секторлардағы қазақстандық әйелдердің құқықтары мен мүмкіндіктерін кеңейтудің өзекті мәселелері, қауіпсіздік пен бейбітшілікті қамтамасыз етудегі, жанжалдардың алдын алу мен реттеудегі және әйелдер мен ерлердің тең құқығына қол жеткізудегі әйелдердің рөлі талқыланды.   Талқылауға Қазақстан Республикасының Әділет Вице-министрі - Ақерке Ахметова, М.С.Нәрікбаев атындағы КАЗГЮУ Университетінің Басқарма төрағасы Талғат Нәрікбаев, Қазақстан Республикасындағы Германия Федеративтік Республикасының Елшісі - Моника Иверсен, Қазақстан Республикасының Адам құқықтары жөніндегі уәкілі - Эльвира Әзімова, БҰҰ Қазақстан Республикасындағы әйелдер өкілі - Мария Доценко, АҚШ-тың Қазақстан Республикасындағы Елшілігінің әйелдердің экономикалық құқықтары мен мүмкіндіктерін кеңейту мәселелері жөніндегі кеңесшісі - Лаура Лозано де Хэйс, сондай-ақ мемлекеттік органдардың, дипломатиялық корпустың, халықаралық және қоғамдық ұйымдардың өкілдері, қоғам қайраткерлері, ЖОО өкілдері мен студенттері, БАҚ өкілдері қатысты.   Спикерлер әйелдерге, бейбітшілік пен қауіпсіздікке қатысты сын-тегеуріндерге байланысты өзекті мәселелерді қозғады. «Қазақстанның тең құқықтары мен тең мүмкіндіктері институты» қоғамдық қорының президенті Маргарита Өскембаева осы тақырыпта жеке баяндама жасады. М.С. Нәрікбаев атындағы КАЗГЮУ университетінің Халықаралық экономика мектебінің деканы Сәуле Кемелбаева Қазақстандағы гендерлік айырмашылық мәселелерін мәлімдеді. Цифрландыру кезеңіндегі гендерлік квоталар мен цифрлық технологиялар және оны одан әрі дамыту туралы "Techno women" қауымдастығының жетекшісі Азиза Шужеева, Here Technologies аймақтық директоры Ажар Нұртазина айтып берді.   Елімізде әйелдер кәсіпкерлігінің қалыптасуы мен дамуын "Qareket Жақсылық жаса" қоғамдық қайырымдылық қорының жетекшісі - Сырғабаева Дина таныстырды. Еуразия технологиялық университетінің адам құқықтарын зерттеу, инклюзия және азаматтық қоғам орталығының директоры, құқықтың қауымдастырылған профессоры Халида Ажигулова жұмыс орнындағы кемсітушілік пен харассмент, алдын алу саясаты және онымен күресу құралы туралы өз көзқарасымен бөлісті.   Этикалық көшбасшылық туралы өз пікірін М.С. Нәрікбаев атындағы КАЗГЮУ Университетінің Басқарма төрағасының орынбасары Айнұр Кәрібозова білдірді. Кездесуді ҚР Премьер-Министрінің кеңесшісі Гүлбану Пазылхаирова жүргізді. Дөңгелек үстелге қатысушылар әйелдердің өз әлеуетін іске асыруына қандай тосқауылдар кедергі келтіретінін және мемлекеттің тұрақты дамуы мен әл-ауқатына қол жеткізу, өңірлік және жаһандық бейбітшілік пен қауіпсіздікті ілгерілету мақсатында әйелдер көшбасшылығына жәрдемдесу үшін қандай шешімдерді ұсынуға болатынын талқылады.