Қазақстанның Денсаулық сақтау министрлігі 2026 жылдың 7 наурызынан бастап медицина қызметкерлеріне күш көрсеткендерге қатысты Қылмыстық кодекске енгізілген жаңа өзгерістер күшіне енгенін мәлімдеді, деп хабарлайды Ozgeris.info сайты.
Енді заңнамада қызметтік міндетін атқарып жүрген дәрігерлер мен жедел жәрдем жүргізушілерінің өмірі мен денсаулығына қол сұққандарды қылмыстық жауапқа тартатын арнайы бап бар. Жаңа ережеге сәйкес медицина мамандарына қорқыту әрекеті үшін 200-ден 500 айлық есептік көрсеткішке дейін айыппұл салу немесе 300 сағатқа дейін қоғамдық жұмысқа жегу, болмаса 2 жылға дейін бас бостандығынан айыру жазасы қарастырылған. Бұл қылмыс ауырлататын мән-жайлармен жасалса, шектеу немесе қамау мерзімі 2 жылдан 3 жылға дейін ұзарады. Денсаулыққа қауіп төндірмейтін зорлық-зомбылық қолданғандарға 500-ден 1000 АЕК-ке дейін айыппұл салынады немесе 600 сағатқа дейінгі қоғамдық жұмысқа тартылып, 3 жылға дейін сотталуы мүмкін. Ал қызметкердің өмірі мен денсаулығына қауіп төндіретін күш қолданылса, айыпты 5 жылдан 10 жылға дейін, ауырлататын жағдайларда 12 жылға дейін бас бостандығынан айырылады.
Заңнамалық өзгерістермен қатар ауруханаларда қауіпсіздік шаралары да күшейтіледі. Алдағы уақытта екі мыңнан астам фельдшер бейнежетондармен қамтамасыз етіліп, 636 қабылдау бөліміне дабыл түймелері орнатылады және бейнебақылау жүйелері зияткерлік аналитикамен біріктіріледі. Сонымен қатар еліміздегі 152 стационарда тәулік бойы жұмыс істейтін полиция бекеттерінің қызметі жалғасады.
«Мемлекет басшысы бұған дейін медицина қызметкерлерінің денсаулығы мен амандығына нұқсан келтіретін мұндай оқиғалар Заң және Тәртіп тұжырымдамасының қағидаттарына сәйкес құқықтық алаңда қатаң тоқтатылуы тиіс екенін атап өткен болатын. 2019 жылдан бері Қазақстанда дәрігерлерге, фельдшерлерге, мейірбикелерге және басқа да денсаулық сақтау жүйесінің қызметкерлеріне шабуыл жасаудың 280-нен астам фактісі тіркелді», - деп мәлімдеді министрлік өкілдері.
Айта кетейік, медицина қызметкерлерін қорғауға бағытталған бұл заң жобасы 2024-2025 жылдары белсенді түрде талқыланған. Негізгі құжатты Сенат 2025 жылдың желтоқсанында мақұлдап, оған президент 2026 жылдың басында қол қойды. Осылайша Қылмыстық кодекске жаңа 380-3 бабы енгізілді, ал бұған дейін құқық бұзушыларға қатысты тек жалпы нормалар қолданылып келген еді.
