Қырғызстан Ұлттық қауіпсіздік мемлекеттік комитетінің (ҰҚК) Бішкек қаласы бойынша бас басқармасының бұрынғы бастығы Эльдар Жақыпбеков ұсталып, қалалық ІІБ уақытша ұстау изоляторына қамалды, деп хабарлайды Ozgeris.info сайты.
24.kg агенттігінің дерегінше, бұрынғы шенеунікке қатысты істі әскери прокуратура тергеп жатыр. Күштік құрылымдағы дереккөздер процестік амалдардың соңғы тәулікте жүргізілгенін растады. Әлеуметтік желілерде оның ұсталған сәтінен түсірілген делінген сурет тарап кетті, алайда әзірге оған нақты қандай айып тағылғаны және істегі мәртебесі туралы ресми ақпарат жарияланған жоқ.
Айта кетейік, 14 ақпан күні Бішкек қалалық басқармасына жаңа басшы болып Ұлан Бийбосынов тағайындалған болатын, ал Жақыпбеков кадрлар қарамағына жіберілген еді. Негізінен шенеуніктің ұсталуы мүмкін екендігі туралы ақпарат 10 ақпан күні пайда болған, бірақ сол кезде ведомство өкілдері бұл мәліметті жоққа шығарған болатын.
Бұл оқиға көрші елдегі ауқымды кадрлық өзгерістер тұсында болып отыр. Дәл сол күні, яғни 10 ақпанда Қырғызстан президенті Садыр Жапаров өзінің ұзақ жылғы серігі, 2020 жылдың қазанынан бері қызмет етіп келе жатқан Қамшыбек Ташиевті Министрлер кабинеті төрағасының орынбасары және ҰҚК төрағасы лауазымдарынан босатты. Сол уақытта жеке шаруаларымен Германияда жүрген президент үшін бұл шешім тосын жағдай болғанын мойындады.
Ташиевтің орнына комитет басшысының міндетін атқарушы болып Жұмғалбек Шабданбеков тағайындалды. Сонымен қатар ҰҚК төрағасының үш орынбасары да қызметтен кетті. Президент әкімшілігі бұл қадамды «мемлекет бірлігін нығайту» және қоғам мен мемлекеттік құрылымдар арасындағы алауыздыққа жол бермеу мақсатымен түсіндірді.
