«Біресе боқтап, біресе намаз оқыды»: Ақнәр Гүлстанның құрбысы бар шындықты жайып салды

Ақнәр Гүлстанның өлімі бастапқыда «суицид» деп тіркелгенімен, марқұмның анасы мұнымен келіспейді. Қайғылы жағдай болған күні Ақнәр көрші тұратын құрбыларына Қытайдан келген киім-кешекті көрсетуге барған көрінеді. Ол үйде үш қыз болған. Анасының айтуынша, олардың арасында жанжал туып, екеуі марқұмды ұрып-соғып, азаптай бастаған екен. Үшінші қыз Дидар сол сәтте әжетханаға тығылып, Ақнәрдің анасына аудио жазба жіберіп үлгерген. Аудио жазба жіберген Дидар есімді бойжеткен Руслан Өтепбайға сұхбат беріп, оқиғаның мән-жайын баяндап берді. «2024 жылы 18 шілдеде Ақнәр өзі маған хабарласып, Рананың шешесі қайтыс болды, бірге қара шәйға отырайық деді. Содан сол күні мейрамханаға барып, қара шәй бердік. Екінші күні, яғни 19 шілдеде Ақнәр маған хабарласып, саған барайын деді. Үшеуміздің ортақ чатымызда Ақнәр сол күні алкоголь ішкісі келіп, бізге ішейік деді. Мен іше алмаймын, тек аз ғана сыра іше аламын дедім. Ақнәр Гуанчжоуға барып, зат әкелді. Соны бізге әкеп, көрсетемін деді. Ақнәр менен көп қарыз алды. Өзі сыйлық ретінде тауарынан бізге сыйлық ретінде бергісі келді. 19 шілдеде кешке келді. Ақнәр алдын-ала маған сыраға тапсырыс бергізген. Рана менің етіккірім келді, ішім ауырып тұр, мен іше алмаймын деді. Олар келгенде мен дастархан жайып қойдым. Олар қонатын болып келді. Тамақтанып болып, басқа бөлмеге түнгі 1 шамасында бардық. Ол жақта сыра ішіп, өлең қойып биледік. Үшеуміз де іштік. Барлығымыз 4 сыра іштік. Менің қанымнан 0.003 спирт табылды», — дейді ол. Алайда, Руслан Өтепбай сот-медициналық сараптама нәтижесінде Ақнәрдің қанынан спирт табылмағанын айтады. Оқиғаны ары қарай баяндаған Дидар сол күні Ақнәрдің теледидарды сындырғанын айтты. «Ақнәр билеп жатқанда теледидарды құлатып, бетін шағып тастады. Ол кешірім сұрап жылады. Менің басымда қарызым көп, 2 миллион қарызым бар, төлей алмаймын деді. Банктің адамдары отбасыма хабарласып жатыр деді. Сосын мен сенің қарызыңды төлеп берейін, сен асықпай маған бер дедім. Ол жылады, мен оны қойныма отырғызып, жатқыздым. Арада он минут өткенде ұйқыдан тұрып, өзін-өзі ұрып, жылады. Рана ол кезде басқа жақта отырды. Біз Ақнәрдан не болды деп сұрағанымызда ол жауап бермей, бізді жолатқызбай, ұрды. Басуға тырыстық. Өзінің басын, денесін ұрды. Маңайына жолатқызбады. Не себепті мұндай әрекетке барғанын түсінбедік. Ақнәр Рананың анасын жаман сөзбен боқтады. Біресе боқтап, біресе намаз оқыды. Желіде тараған видеода Асқар деген Рананың әкесінің аты айтылып жатыр. Видеода мен қолыммен оның мойны жерге тимесін деп ұстап тұрмын. Видеодағы оқиғадан кейін Ақнәр атып тұрып, Рананың шашын жұлды. Рана шыңғырды. Мен оларды ажыратуға тырыстым. Күшім жетпеді. Видеоны өзімнің телефоныммен түсіріп, Ақнәрдің әпкесі Жансаяға жібердім. Мекен-жайды да жіберіп, Ақнәр Рананы өлтіріп жатыр дедім. Мен қатты қорықтым. Мен жіберген аудио жазбаға «қазір барамын деп жауап берді». Мен полиция мен үй іштеріне хабарласайын деп әжетханаға кіріп кеттім. Жедел жәрдемге хабарластым. Сырттан көмек сұрауға қорықтым. Себебі, бұған дейін Ақнәрдің жатақханада қыздарды пышақпен қуалағанын естігем. Ақнәр 7 қабаттан құлаған кезде мен дәретханада болдым. Менің ойымша, ол өзі секірді. Бірнеше рет өзіне қол жұмсамақ болғанын білемін. Бірге пәтерде тұрған уақытымызда секіргісі келген видео бар. Одан бөлек, жатақханада да секірмек болып, бес жігіт ұстап қалғанын естідім», — дейді ол.