2025 жылдың алғашқы тоқсанында еліміздегі банктер бір-бірімен пайда жарысын өткізгендей болды. Ұлттық банктің 1 сәуірдегі есебіне сүйенсек, Қазақстандағы банк секторының жалпы табысы 664 миллиард теңгеге жеткен. Бұл былтырғыдан 16,6% артық. Дегенмен бәріне бірдей май жақпаған: 21 банктің сегізі өткен жылмен салыстырғанда аз пайда тапқан, деп хабарлайды Ozgeris.info.
Мәселен, ірі банктердің қатарындағы Jusan Bank 2024 жылы 44,6 млрд теңге табыс тапса, биылғы көрсеткіші 39,3 млрд теңгеге дейін төмендеген. Еуразиялық банктің де жағдайы мәз емес: 37,8 млрд теңге пайдадан 16,7 млрд теңгеге дейін құлдыраған. Ал Freedom Bank үшін бұл тоқсан тіпті қиын кезеңге айналды – былтыр 19,3 млрд теңге тапқан банк 2025 жылдың 1 сәуірінде 37,2 млрд теңге шығынға ұшыраған. Сонымен қатар, табысы азайған банктер қатарында Citibank Kazakhstan, Altyn Bank, Shinhan Bank, Нұрбанк және Зираат Банкі де бар.
Ал табыс өсімін көрсеткен банктер қатарында жарқырап алға шыққандар бар. Мысалы, Bereke Bank табысын бірден 29 есеге арттырып, 13,2 млрд теңгеге жеткізген. Заман-Банк те серпін көрсетіп, 10 есе өсіммен 4,2 млрд теңге тапқан. Банк ЦентрКредит (БЦК) 78,5 млрд теңге пайдамен жылды бастады, бұл – былтырмен салыстырғанда екі есеге жуық өсім. Halyk Bank әдеттегідей көш басында – 247,1 млрд теңге табыспен. Kaspi Bank те өз тұрақтылығын дәлелдеп, 128,3 млрд теңге кіріс көрсеткен. Сонымен қатар, ForteBank, Bank RBK, Home Credit Bank, ВТБ, Отбасы банк те табысын 1,2–1,4 есе аралығында ұлғайтқан.
Cонда сандар не дейді? Біріншіден, нарықта бәсеке күшейген. Кей банктер қызметін тиімді жүргізіп, клиентпен жұмысын жетілдірсе, енді бірі қаржылық қиындықтарға тап болып отыр. Freedom Bank сияқты банктер үшін бұл нақты дабыл – стратегияны қайта қарап, тәуекелдерді басқаруды күшейту керек. Ал Bereke Bank пен ислам банктерінің серпіні – қаржы нарығында жаңа ойыншылардың позициясын нығайтып келе жатқанын білдіреді. Жалпы алғанда, бұл кезең банктер үшін табыс жарысы ғана емес, сенім үшін күрес екенін көрсетті.
Елриза САЛЫҚҚЫЗЫ
