Астана қаласының Байқоңыр ауданында орналасқан қоқыс полигонындағы өрт бірнеше күннен бері ауыздықталмай жатыр. Құтқарушылар тілсіз жаумен тәулік бойы тоқтаусыз күресуде. Бастапқыда бұл аумаққа 90 адам жұмылдырылған болатын. Қазіргі сәтте қауіптің беті қайтпағандықтан күш еселеніп, оқиға орнында 120 маман мен 150 арнайы техника тынымсыз еңбектенуде, деп хабарлайды ozgeris.info сайты.
Төтенше жағдайлар министрлігі жалынды сөндіру үшін барын салуда. Мамандар оттың оттегімен байланысын үзіп, одан әрі таралуын тоқтату мақсатында жанып жатқан ошақтарды инертті материалмен тұншықтырып жатыр. Ол үшін полигон аумағына 15 мың тоннаға жуық топырақ төгілді. Сонымен бірге өрт сөндіру автоцистерналары мен су таситын көліктер қажетті сұйықтықты үздіксіз жеткізіп тұр.
Алайда алып аумақты толықтай сөндіру үлкен қиындыққа айналды. Айналаны қою түтін басып қалған. Үйілген қоқыс қалдықтары өте бос әрі тұрақсыз болғандықтан ауыр техникалардың қозғалысын айтарлықтай тежейді. Алып көліктер жалын ошақтарына еркін жете алмай, аумақта маневр жасауға үлкен кедергілер туындауда.
