Алматы қаласында прокуратура мемлекеттік мүліктік мүдделерді қорғау аясында ірі қаржылық бұзушылықтарды анықтап, бюджетке қомақты қаражатты өндіріп алды. Бұл туралы ozgeris.info сайты хабарлады.
Тексеру барысында Қазақ құрылыс және сәулет ғылыми-зерттеу институты акционерлік қоғамының қызметінде заңбұзушылықтар болғаны белгілі болды. Атап айтқанда, нысандарды паспортизациялау процесінде мемлекетке залал келтірілген.
Прокуратураның талап арызы негізінде сот арқылы мемлекет пайдасына 894 177 000 теңге көлемінде қаражат өндірілді. Сонымен қатар 26 825 310 теңге мөлшерінде мемлекеттік баж салығы да өндіріп алынған.
Алматы қаласының азаматтық істер жөніндегі сот алқасы бірінші инстанция сотының шешімін өзгеріссіз қалдырды. Осылайша, сот актісі заңды күшіне енді.
