Алматының бұрынғы әкімі Виктор Храпуновқа қатысты сот үкімі шыққанына сегіз жылға жуықтады. Алайда тәркіленген мүлікке қатысты дау әлі басылған жоқ. Биылғы ақпан айында қалалық сот тартып алынған жер телімін қайтармақ болған компанияның шағымын қанағаттандырмады. Бұл іс Қазақстан тарихындағы ең ірі жемқорлық процестерінің бірі саналады, деп хабарлайды ozgeris.info сайты orda.kz ке сілтеп.
Қылмыстық схема мың тоғыз жүз тоқсан жетінші жылы басталған. Қала тізгінін ұстаған Виктор Храпунов жұбайы Лейламен бірге ұйымдасқан топ құрады. Құрамында шенеуніктер мен туыстары бар топ мемлекет мүлкін туысқандары басқаратын компанияларға өткізіп отырған. Ал ақшаны шетел асырып заңдастырған.
Алғашқы ірі нысан Таулы көшесіндегі әкім резиденциясы болды. Тоғыз гектардан астам жер шетелдік компанияға берілді. Кейін аумақ бөлшектеліп сатылып кеткен. Отбасы бұл келісімнен бір миллиард теңгеден астам заңсыз пайда көрді.
Назарбаев даңғылындағы бұрынғы балабақшаның тағдыры да осылай шешілді. Ғимарат небәрі елу екі миллион теңгеге сатылды. Ал нысанның нақты нарықтағы құны екі жүз сексен сегіз миллион теңгеден асатын еді.
Самал ықшамауданындағы құнды жер телімдері мемлекет мұқтаждығы үшін деген желеумен заңды иелерінен тартып алынды. Кейін бұл жер Лейла Храпуноваға он бес миллион теңгеге сатыла салды. Нақты бағасы алты жүз миллионнан асатын.
Бұрынғы әкім тікелей пара алудан да тайынбаған. Құрылыс жүргізуге рұқсат бергені үшін бір компания оның әйеліне элиталық кеңселерді сыйға тартады. Бұл жылжымайтын мүлік тез арада сатылып түскен төрт миллион доллар қызының Швейцариядағы есепшотына аударылған.
Тарихи ескерткіш те жекеменшікке өтіп кетті. Сыртқы істер министрлігінің Қабылдау үйі заңсыз жекешелендіріліп он миллион теңгеге сатылды. Бірнеше жылдан соң бірегей нысан бір жарым миллиардқа жуық сомаға қайта сатылған. Қатаң заң Ұлы Отан соғысы ардагерлерінің емханасын да аман алып қала алмады. Ғимарат таныс компанияға он тоғыз миллион теңгеге берілді.
Отбасы ерекше қорғалатын табиғи аумақтарды да жаппай сатып алды. Әкімнің туыстары Медеу табиғи паркіндегі жерлерді және термалды бұлақтары бар учаскелерді иемденді. Сайран көлінің маңындағы аумақ жеті миллион теңгеге сатып алынып бірнеше аптадан соң екі жүз жетпіс миллионға сатылды. Тез тамақтану орнын салуға екі жарым миллионға берілген жерді қала билігі жол айрығын салу үшін екі жүз бір миллион теңгеге қайта сатып алуға мәжбүр болды.
Мемлекетке келтірілген жалпы шығын екі жүз елу миллион доллардан немесе сексен миллиард теңгеден асты. Екі мың он сегізінші жылы сот Виктор Храпуновты сырттай он жеті жылға бас бостандығынан айырды. Оның жұбайы он төрт жылға сотталды. Сот заңсыз табылған барлық мүлікті тәркілеуге үкім шығарды. Храпуновтар отбасы Қазақстаннан баяғыда кетіп қалған. Қазір олар Швейцарияда саяси босқын мәртебесінде өмір сүріп жатыр және өз кінәларын мүлдем мойындамайды.
