Ақтөбе қаласында аса ірі мөлшерде пара талап еткен Экономикалық тергеп-тексеру департаментінің аға тергеушісіне және оның сыбайласына қатысты сот үкімі шықты. Атышулы іс қылмыстық істер жөніндегі мамандандырылған ауданаралық сотында қаралды деп хабарлайды ozgeris.info сайты DIAPAZON.KZ ке сілтеп.
Сотталушылар орындығында 45 жастағы аға тергеуші Ермек Махамбетов пен осы департаменттің екінші жедел басқарма басшысының орынбасары, 44 жастағы Дәулет Сарин жауапқа тартылды.
Махамбетовтің өндірісінде тұтыну кооперативінің өкіліне қатысты "қаржы пирамидасы" бабы бойынша қылмыстық іс болған. Тергеуші күдіктіні ұзақ мерзімге абақтыға жабамын деп қорқытып, істі толықтай тоқтату үшін одан 50 миллион теңге көлемінде пара талап еткен. Ол бұл қылмыстық іске әріптесі Дәулет Саринді делдал болуға көндірген.
Тығырыққа тірелген жәбірленуші бірден Ұлттық қауіпсіздік комитетіне (ҰҚК) шағым түсірген. Нәтижесінде Дәулет Сарин доллармен пара алып жатқан жерінде қылмыс үстінде ұсталды. Айта кетейік, берілген қаражаттың басым бөлігі арнайы дайындалған жалған ақша (муляж) болған. Іле-шала негізгі күдікті Ермек Махамбетов те құрықталды.
Сот екі шенеунікті де кінәлі деп тауып, мынадай үкім шығарды:
-
Пара алуға оқталған Ермек Махамбетов 10 жылға бас бостандығынан айырылды.
-
Жемқорлыққа делдал болған Дәулет Саринге 2 жыл түрме жазасы тағайындалды.
Бұған қоса, сот екі азаматқа да өмір бойы мемлекеттік қызметте жұмыс істеуге қатаң тыйым салды. Сондай-ақ Махамбетов жәбірленушіге келтірілген моральдық шығын үшін қосымша 2 миллион теңге төлеуге міндеттелді.
Сот үкімі әзірге заңды күшіне енген жоқ.
