Көкшетауда ауыр қылмыс ашылды: жоғалған азамат өлі күйінде табылды

Көкшетау қаласында 41 жастағы Жанболат Кенжахметовтің өліміне қатысты тергеу амалдары жүргізілуде. Ол шамамен он күн бұрын жоғалып кеткен еді. Полиция оның денесін тапты, зорлық белгілері анықталған, деп хабарлайды ozgeris.info сайты “Қылмыстық Қазақстан” дерегіне сүйене отырып. Тергеу деректеріне сәйкес, бұл қылмысқа марқұммен бірге алтын өндіру саласында жұмыс істеген 23 жастағы қызметкері күдікті ретінде танылған. Қайтыс болған азаматтың туыстарының айтуынша, олардың арасында үлкен жанжал туындап, күдікті ашуға бой алдырған. Марқұмның анасы Халида Ігелдиева бұл қылмыс алдын ала ойластырылғанын айтады.

– Ол мұны бірнеше ай бойы жоспарлаған, тек қолайлы сәтті күткен. Жалғыз әрекет етпеген. Құмар ойынға әуес болған, – дейді ол.

Полиция мәліметінше, 8 мамыр күні Кенжахметов күдіктінің көлігіне отырған. Бейнебақылау жүйелері оны гаражға жеткізген сәтті түсіріп алған. Дәл сол жерде кісі өлтіру дерегі орын алған. Қылмысты жасыру үшін күдікті мәйітті түнге дейін көлікте сақтап, кейін Станционный ауылына апарып көмген. Көп ұзамай ол ұсталды. Қазіргі таңда оған ҚР ҚК 99-бабы – «Адам өлтіру» бойынша қылмыстық іс қозғалып, тергеу жалғасуда.