Каспий теңізінің тайыздануы Ақтау халықаралық теңіз сауда портының жұмысына кері әсерін тигізіп жатыр, деп хабарлайды ozgeris.info сайты inAktau.kz сайтына сілтеме жасап.
Қазіргі кезде мұнай танкерлері мен жүк кемелері портқа толық жүктелмей, 10 пайызға аз жүкпен кіруге мәжбүр. Бұл олардың қауіпсіз қозғалысын қамтамасыз ету үшін қажет.
«Мысалы, жүк көтергіштігі 6800 тонна болатын танкерге тек 6500 тонна ғана жүктеледі. Ал 12 мың тоннаға дейін жүк көтере алатын кемелерге 9–10 мың тонна шамасында ғана жүк тиеледі. Егер кемені толығымен жүктесек, түбі теңіз табанымен тиіп кетуі мүмкін. Егер биылғы жылдың соңына дейін түбін тереңдету жұмыстарын жүргізбесек және теңіз деңгейі одан әрі түссе, онда кеме қатынасы тиімсіз болады», – деді порт бөлімінің басшысы Ерболат Тлепиев.
Соған қарамастан, биыл жүк тасымалы өткен жылдың осы кезеңімен салыстырғанда 20 пайызға артқан.
Теңіз деңгейінің төмендеуіне байланысты портта түбін тереңдету жұмыстары жоспарланған. Өткен жылы мұндай жұмыстар Құрық портында жүргізілген болатын. Енді Ақтау портында да осы бағытта жұмыстар қолға алынады.