Таразда 519 миллион теңге жымқыру ісі бойынша екі адам сотталды

Тараз қаласында әлеуметтік осал топтарға арналған тұрғын үй құрылысына бөлінген бюджет қаржысын жымқыру ісі бойынша сот үкімі шығарылды, деп хабарлайды ozgeris.info сайты Tengrinews.kz сайтына сілтеме жасап.

Антикордың дерегінше, мердігер ұйым өкілі Ерболатұлы бюджет қаражатын жымқырғаны үшін, ал Тараз қалалық құрылыс бөлімінің басшысы Қалдыбаев қызметтік өкілеттігін асыра пайдаланғаны үшін кінәлі деп танылды. Қалдыбаев жалған орындалған жұмыстар актілеріне қол қойып, заңсыз қаржы аударуға жол берген. Бұл әрекеттер мемлекетке 519 миллион теңгеден астам залал келтірген. Сот үкіміне сәйкес, Қалдыбаев 4 жылға бас бостандығынан айырылып, мемлекеттік және квазимемлекеттік қызметтерде өмір бойы лауазым атқару құқығынан айырылды. Ерболатұлы 6 жылға сотталып, 10 жыл бойы қаржы басқаруға байланысты лауазымдарға орналасу құқығынан айырылды. Сот шешімі заңды күшіне енген жоқ және шағымдануға жатады.