Жамбыл облысында жауын-шашыннан кейін 400-ден астам үйді су алды

Жамбыл облысының әкімі Ербол Қарашөкеев Сарысу ауданы Жаңатас қаласына барып, су алған аулаларды аралап көріп, ахуалмен танысты. 7 шілде күні Сарысу ауданы Жаңатас қаласында қатты жауын-шашын салдарынан бірқатар көшедегі 400-ден астам үйдің ауласы мен 47 үйдің ішін су алды. Шығынды есептеу, қосымша нақтылау шаралары жалғасып жатыр. Әкімдіктегілердің айтуынша, зардап шеккен тұрғындар үшін қабылдау пунктері жұмыс істеп тұр. Азаматтарды тасымалдауға арнайы көліктер қарастырылған. Жалпы төтенше жағдай салдарын жою, қалыпқа келтіру бойынша нақты жұмыстар жүргізіліп жатыр.

"Арнайы комиссия құрылып, тұрғындарға, зардап шеккен нысандарға заң талаптарына сәйкес барлық қажетті көмек, қолдаулар көрсетіледі. Біз бұл қиындықты да бірге еңсереміз", – деді Ербол Қарашөкеев.

Аудандағы ахуал тұрақты, су деңгейі төмендеді. Адам, мал шығыны жоқ, деп сендірді әкімдіктегілер.