«25 жастан кейін некеге тыйым салу, 30 жаста жатырды алып тастау». Саясаткердің ойына байланысты үлкен жанжал туындады

Жапонияның белгілі саясаткері, консервативті партия басшысы Наоки Хякута қоғамда үлкен резонанс тудырды, деп хабарлайды ozgeris.info. Ол жергілікті телеарнаға берген сұхбатында елдегі туу көрсеткішін арттыру мақсатында бірқатар қатаң шаралар қабылдауды ұсынды. Олардың қатарында әйелдерге 25 жастан кейін тұрмысқа шығуға тыйым салу, 30 жастан кейін жатырды алып тастау және 18 жастан кейін университетке түсуге шектеу қою сияқты ұсыныстар бар. Бұл мәлімдемелер жапон қоғамында үлкен наразылық тудырды. Көпшілік саясаткерді әйелдерге қарсы жеккөрушілік пен радикализмге айыптады. Наоки Хякута бұл ұсыныстарын «ғылыми фантастика» деп атап, тек қоғам назарын әлеуметтік құрылымдағы мәселелерге аударуды мақсат еткенін түсіндірді.