"Толқынның әсері денсаулыққа зиян": Шымкенттіктер интернет тарататын станцияларға қарсы

Биыл Шымкентте мобильды байланысты жақсарту үшін 42 базалық станция қойылады. Дегенмен тұрғындар тарапынан оны орнатуға қарсылық көбейген көрінеді, себебі олар құрылғыдан таралатын электро-магниттік толқынның денсаулыққа кері әсері бар деп санайды, деп хабарлайды Ozgeris.info. Телеарнаның ресми сайты Otyrar.kz хабарланғандай, кейбір көшелерде мобильді интернетте жақсарту мақсатында антенна қойылған. Дегенмен радиациядан қорыққан тұрғындар арызы негізінде мамандар оны алып тастауға шешім қабылдаған көрінеді. Шағын аудандағы тұрғындардың көбі талшықты-оптикалық интернетті қолданатынын жеткізді. Соған қарамастан аумақ тұрғындары мұнда байланыстың нашарлығына наразы, тіпті онлайн жұмыс істеу мүмкін емес екенін айтады. Бірақ бұл антенна-баған үйлерінің жанында тұрғанына қарсы, себебі оның пайдасынан зияны көп деп санайды. "Бізде интернет өте нашар істейді. Интернет ұстамаған соң "Қазақтелекомға неге сонша ақша төлеп жатырмыз" деп ашуланып, қызым ақыл айтып, басқа операторға көшіп алдық. Тегі интернеттен қор болып кеттік қой. Ешқандай көмегі жоқ интернеттің. Мұндағы антеннаның алып тастағанын білмейді екенмін. Онда болғанын да білмеппін"- дейді қала тұрғындары. "Бұл жерге ол не үшін керек? Менің ойымша, мұнда антеннаның қажеті жоқ. Бәріміз интернет антеннаның қойылғанына қарсы болдық. Арызымызды естіп алып тастағанына қайта қуанамыз. Қазір темірі ғана тұр. Антенна мұнда тұрған соң міндетті түрде радиациялық сәулесі келеді. Содан қорықтық. Ал өзіміз талшықты интернет желісіне қосылғанбыз". "Алып тастағанын естідім. Осындағы тұрғындар арызданып алдырып тастады-ау. Мен де алдырып тастайтын едім. Өйткені аралар ұшпайтын жерде адамға да зияны бар болады деп ойлаймын. Wi-Fi-дың  да зияны бар ғой. Сол сияқты әсері болады деп ойлаймын", - дейді қала тұрғындары. Былтыр қалада тұрғындарының өтініші бойынша 6 базалық станция алынған. Ал биыл мамандар халықтың көп бөлігі оны қойдыруға қарсы болып жатқанын айтады. Себебі адамдар арасында радиофобия қалыптасқан. Сондықтан антеннаны орнатуға рұқсат сұраған кезде, жергілікті жұртшылық бірден бас тартатын көрінеді. Алайда қаладағы интернет сапасын жақсарту маңызды. Сондықтан жауаптылар қазір мәселелі орындарға арнайы құрылғыларды апарып, тексеріп, зиянсыз екеніне тұрғындардың көзін жеткізуге тырысып жатырмыз дейді.

"Алты орын деген, ол үлкен алты аймақта байланыс жоқ. Ал биыл қойдыртып жатқан жоқ. Мүлде. №106 мектептің артына қоюымыз керек еді. "Біздің үйдің қасына түсті" деп тұрғындар қарсы болған соң орнын ауыстырдық. Бозарықта да жолдың бойына қояйын деп едік. Ол жерде де тұрғындар қарсы болды. Халық көбіне келісімін бермейді. "Өтінеміз, алып кетіңіз" дейді. Ал арғы жағына қояйын десең ол жақта тағы тұрғындар қарсы. Радиус деген болады. Одан ары кетсе, пайдасы болмай қалады", - дейді Шымкент қаласы цифрландыру басқармасының басшысы Мұхит Кемелов.

Биыл қалада әкімдік тарапынан 42 базалық станция қою көзделіп отыр. Ал операторлардың өзі 217 нысанды қайта жаңғырту жұмысын жүргізеді.