Солтүстік Қазақстан облысындағы коммуналдық түйткілдер түйіні тарқамай тұр. Петропавл қаласының Почтовая көшесіндегі 11 және 13-үйлердің тұрғындары ауланың нағыз қоқыс полигонына айналғанын айтып, дабыл қақты. Жыл сайын қайталанатын бұл жағдай биыл да шегіне жеткен. Қоқыс шығаратын мекемелер тек контейнерлердің ішін тонаумен шектеліп, айналасындағы тау болып үйілген қалдықтарды тазалауға асығар емес. Иттер шашқан қоқыс ауланы жайлап, санитарлық талаптар мүлдем ұмытылған. Тұрғындардың қоқыс алаңын ыңғайлы жерге көшіру туралы өтініштері де ескерусіз қалып келеді деп хабарлайды ozgeris.info сайты.
Дәл осындай жағдай көршілес Бескөл ауылында да орын алуда. Мұндағы Спортивная көшесінің тұрғындары екінші күн қатарынан жарықсыз отыр. Оған себеп — құлаудың аз-ақ алдында тұрған электр бағаны. Сұмдығы сол, ауыр бағанды тек көрші үйдің төбесіне қағылған бір шеге мен жұқа трос ұстап тұр. Егер ол үзілсе, жақын маңдағы мектепке баратын балаларға үлкен қауіп төнуі мүмкін. Қызылжар РЭС-і болса, «баған біздің теңгерімізде емес» деп жауапкершіліктен қашып отыр.
Осындай қордаланған мәселелердің фонында Қызылжар ауданы әкімі аппаратының әрекеті халықты одан сайын ашындырды. Ауыл жарықсыз, қала қоқысқа толып тұрған шақта, әкімдік мемлекеттік сатып алу порталы арқылы бірден екі су жаңа көлік алуға тапсырыс берген. Осы мақсатқа бюджеттен 13 180 000 теңге бөлініп отыр.
«Балаларымыз шегеге ілінген бағанның астымен мектепке қорқынышпен барады, ауламызды қоқыс басты. Ал әкімдікке жайлы көлік керек пе?» — деп кейістіді аймақ тұрғындары. Халық шенеуніктерден бюджет қаржысын алдымен халықтың қауіпсіздігі мен тазалығына, содан кейін ғана өз жайлылықтарына жұмсауды талап етеді. СҚО-дағы бұл қайшылықты жағдай жергілікті биліктің халық мұңына қаншалықты құлақ асатынын көрсететін үлкен сынға айналып отыр.
