Қазақстанда блогерлерге саяси партиялар мен үміткерлерді жасырын үгіттегені үшін әкімшілік жауапкершілік қарастырылғаны ескертілді. Бұл мәселе Мәжіліс қабырғасында талқыланып, Орталық сайлау комиссиясының (ОСК) өкілдері заң талаптарын түсіндірді деп хабарлайды ozgeris.info сайты.
Мәжіліс депутаты Никита Шаталов отырыс барысында мынадай гипотетикалық мысал келтірді: егер оқырманы көп блогер ешқандай қаражат алмай және ресми келісімге отырмай, кадрда үнемі партия символикасы бар кепешпен шығып, белгілі бір кандидатты ашық қолдаса, бұл заң бұзушылық санала ма?
ОСК хатшысы Шавкат Өтемісовтің айтуынша, заңға сәйкес үгіт-насихат жұмыстарына қатысу үшін міндетті түрде кандидаттың немесе партияның қызмет көрсетуге келісімі (жазбаша түрде) болуы шарт.
-
«Егер блогер кандидатпен келісімшартқа отырмаса және жазбаша рұқсат алмаса, бұл әрекет жасырын үгіт-насихат ретінде сараланады. Бұл үшін Әкімшілік құқық бұзушылық туралы кодекстің 118-бабына сәйкес жауапкершілік көзделген», — деп түсіндірді Өтемісов.
-
Егер посттар мен видеолар ешқандай ақысыз және ресми келісімсіз жарияланса, заңдық міндеттеме тікелей туындамауы мүмкін. Алайда, кандидатпен ешқандай байланыс болмаған күннің өзінде, оны үнемі насихаттау заң тұрғысынан жасырын үгіт ретінде бағаланады және тиісті жауапкершілікке әкеп соғады.
Осылайша, елімізде сайлауалды үгіт-насихат кезеңінде танымал тұлғалар мен блогерлердің кез келген саяси қолдауы тек ресми құжаттар негізінде жүзеге асуы тиіс екені қатаң ескертілді.
