Қазақстанның бірқатар өңірлерінде көктемгі кезеңге байланысты ауыр жүк көліктерінің қозғалысына уақытша шектеу енгізіледі. Бұл туралы Көлік министрлігі хабарлады деп жазды ozgeris.info сайты.
Шектеулер 23 наурыз бен 1 мамыр аралығында күшіне енеді. Бұл шаралар жол жабынын сақтау мақсатында жыл сайын көктемде енгізіледі, себебі осы уақытта жол негізі әлсіреп, зақымдануға бейім болады.
Шектеу Ақмола, Ақтөбе, Шығыс Қазақстан, Батыс Қазақстан, Қарағанды, Қостанай, Солтүстік Қазақстан, Павлодар облыстары мен Абай облысында қолданылады. Бұл өңірлерде бір оське түсетін жүктеме 8 тоннадан асатын жүк көліктерінің қозғалысы шектеледі.
Ал оңтүстік және батыс өңірлерде мұндай шектеулер бұрыннан енгізілген және 1 сәуірге дейін жалғасады. Олар Алматы, Атырау, Жамбыл, Қызылорда, Маңғыстау, Түркістан облыстарында, сондай-ақ Жетісу мен Ұлытау өңірлерінде әрекет етеді.
Айта кетейік, бұл талаптар халықаралық тасымалдарға, жолаушылар көлігіне, азық-түлік, дәрі-дәрмек және төтенше жағдайларға қатысты жүктерге қолданылмайды.
