Түркістан облысына жұмыс сапарымен барған Қазақстан Республикасының Премьер-министрі Олжас Бектенов өңірдегі су тапшылығына қарсы атқарылып жатқан жұмыстармен танысты. Ол «Шардара» су қоймасы мен «Көксарай» су реттегішін аралап, гидротехникалық нысандардың жай-күйін тексерді деп хабарлайды ozgeris.info сайты.
Биыл оңтүстік өңірлерде жауын-шашын аз, ал Дүниежүзілік метеорологиялық ұйым мен климат орталықтарының болжамы бойынша, құрғақшылық ұзаққа созылуы мүмкін. Бұл егін шаруашылығына қауіп төндіріп отыр, әсіресе Сырдария өзені бассейнінде.
Осыған байланысты Үкімет ішкі суды тиімді пайдаланумен қатар, Сырдарияның жоғарғы жағында орналасқан көршілес елдермен су бөлісу мәселесі бойынша келіссөздер жүргізуде. Келісімдер нәтижесінде суды уақытылы алуға мүмкіндік бар.
Шардара су қоймасы Түркістан мен Қызылорда облыстарын суармалы сумен, ал Шардара қаласын ауыз сумен қамтамасыз ететін маңызды нысан. Бектенов су бөлу кезінде ашықтықты арттырып, бақылауды күшейту қажет екенін айтты.
Сондай-ақ, «Көксарай» су реттегішін қайта жаңарту жұмыстары жеделдетілмек. Бұл шаралар оңтүстік өңірлердің шаруаларын тұрақты сумен қамтуға бағытталған. Премьер-министр трансшекаралық сулар көлемінің азаюын ескеріп, ішкі су көздерін дамытуға ерекше назар аударылатынын жеткізді.
Президент тапсырмасына сай, ел бойынша 20 жаңа бөген салынып, 15 су қоймасы жөнделмек. Түркістан қаласына қосымша 113 млн текше метр су жеткізіліп, тұрақты сумен қамту қамтамасыз етіледі.
Сапар қорытындысында Су ресурстары және ирригация министрлігіне және Түркістан облысы әкімдігіне су жобаларын қаржыландыру мен жүзеге асыруды уақтылы қамтамасыз ету тапсырылды.
