Ақсу қаласына қарасты Береке ауылының бөлімшесіндегі нысан осыдан 30 жыл бұрын салынған. Бастапқыда баспана ретінде пайдаланылған. Кейін екі үйдің бір жақ бөлігі мемлекет меншігіне сатып алынып, 4 сыныптық мектеп жасақталған.
Ауылдан тұрғындар жаппай көше бастаған соң білім ошағы жабылып тынған. Қазір елдімекенде бір ғана отбасы тұрып жатыр. Ал бұрынғы мектеп ғимаратын сату үшін жергілікті әкімшілік былтыр 6 айы бойы аукцион өткізіпті.
Бастапқыда 1 млн 600 мың теңге деп белгілеп, сатып алушы болмаған соң арзандата берген. 2023 жылдың мамырындағы бағалау бойынша ғимараттың құны 561 мың теңгеге түскен. Ақыры бір бөлке нанның бағасына бере салған.
"Негізі – бетон, сыртқы қабырғалары – пеноблоктар, шатыры – шифер, едені – ағаш, терезелері – қос қабатты ашпалы, есіктері – қарапайым ағаш, ішкі әрлеуі – әктелген. Жалпы ауданы – 92,10 шаршы метр. Функционалдық мақсаты – бастауыш мектеп", – делінген электрондық сауда алаңындағы лот сипаттамасында.
