Танымал шахматшы Бибісара Асаубаеваның Мемлекет басшысына жолдаған ашық үндеуінен кейін ҚР Туризм және спорт министрлігі жедел баспасөз мәслихатын өткізді. Жиын барысында ведомство өкілдері қоғамда үлкен резонанс тудырған қаржыландыру дауына қатысты өз ұстанымдарын нақтылады, деп хабарлайды ozgeris.info сайты.
Баспасөз мәслихатында сөз алған Туризм және спорт вице-министрі Серік Жарасбаев соңғы уақытта спортшылардың әлеуметтік желілерде жиі арыз-шағым айту тенденциясына қатысты сыни пікірін ашық жеткізді. Оның пайымдауынша, қазіргі таңда материалдық мәселелер алдыңғы орынға шығып, ұлттық намыс пен мемлекет алдындағы жауапкершілік көлеңкеде қалып бара жатқандай әсер қалдырады.
Шенеунік өз сөзінде спорт саласындағы материалдық талаптардың тым алға шығып кеткеніне алаңдаушылық білдірді.
«Көптеген спортшымыз үшін қаржыландыру мәселесі бірінші орынға шыға бастады. Қаражат мүлдем жоқ емес, бірақ бұрын басты назарда болған дүниелер – патриотизм, ел намысын қорғау, мемлекет алдындағы жауапкершілік қандай да бір себептермен екінші жоспарға ысырылуда. Оның орнына әлеуметтік желілер арқылы материалдық сипаттағы сұрақтар белсенді талқыланып жатыр, өкінішке қарай, біз осындай тенденцияны байқап отырмыз», – деді Серік Жарасбаев.
Серік Жарасбаев мәселенің мәнісін тереңірек түсіндіре келе, мемлекет пен жеке меценаттар тарапынан жасалып жатқан үлкен қолдаулардың кейде тез ұмытылып қалатынына қынжылыс білдірді.
Оның айтуынша, спортшылар медаль жеңіп алып, ел атын шығарғанда мемлекет те, демеушілер де олардың жеңісіне шын қуанып, сыйлықтар мен қосымша ынталандырулар табыстайды. Алайда бұл жақсылықтардың тез ұмытылуы спортты дамытуға өз қалтасынан қаражат салатын адамдар мен ұйымдардың арасында алаңдаушылық туғызатынын ескертті.
Вице-министр спортшыларды халықаралық аренада тек Қазақстанның оң имиджін қалыптастыруға шақырып, кез келген ішкі келіспеушілікті интернетте жарияламауға кеңес берді:
Қаржыландыру мен материалдық игіліктер екінші кезекте қалуы тиіс.
Әлеуметтік желідегі талқылаулар Қазақстан шекарасынан асып кетіп, өзге мемлекеттерде теріс пікір тудыруы мүмкін.
Қандай да бір түйткілдер туындаса, оларды ашық желіде емес, арнайы федерациялар мен менеджерлер деңгейінде, бірлесе талқылап шешкен жөн.
Еске сала кетейік, Бибісара Асаубаеваның Президентке жасаған үндеуінен кейін өткен бұл шұғыл жиында Серік Жарасбаев шахматшының шағымдарын ресми түрде жоққа шығарды. Сонымен қатар ол Мемлекет басшысының спортшыға арналған марапаты неліктен әлі күнге дейін табысталмай жатқанының себебін түсіндіріп өтті.
