Екібастұз қаласының әкімі қаладағы санитарлық тазалық пен абаттандыру жұмыстарын тексеру барысында айтқан мәлімдемесі әлеуметтік желі қолданушылары арасында қызу пікірталас тудырды, деп хабарлайды ozgeris.info.
Instagram желілерінде тараған видеода қала әкімі көшелерді аралап, анықталған барлық кемшіліктерді бір тәулік ішінде жоюды талап еткені көрсетілген.
Жазба авторының мәліметінше, әкім санитарлық тазалық пен абаттандыру жұмыстарының жай-күйін тексеріп, жауапты тұлғаларға барлық заңбұзушылықты 24 сағат ішінде жоюды тапсырған. Сондай-ақ кінәлілерге тиісті аумақтарды шұғыл түрде ретке келтіру жөнінде қатаң ескерту жасағаны айтылған.
Алайда әкімнің бұл мәлімдемесі әлеуметтік желі қолданушыларының түрлі пікіріне себеп болды.
Кейбір желі қолданушылары әкімнің талаптары қолданыстағы заң талаптарына сәйкес келмеуі мүмкін екенін алға тартты.
«Әкімшілік құқық бұзушылық бойынша "бір тәулік" деген ұғым жоқ. Мерзімді әкім емес, заң белгілейді. Егер заң бойынша әрекет етсек, алдымен сот шешімі болуы керек. Әкім өз өкілеттігін асыра пайдаланбауы тиіс», – деп жазды желі қолданушыларының бірі.
Тағы бір пікірде:
«Шын мәнінде қорқытып тұр. Бұл – өкілеттігін асыра пайдалану», – делінген.
Ал өзге қолданушылар әкімнің басқару стилін сынға алып, мәселені талап қоюмен емес, тұрғындарды тыңдау арқылы шешу қажет екенін жазған.
«Қатал болуды кез келген адам біледі. Ең бастысы – халықты тыңдай білу», – деп пікір қалдырған желі қолданушысы.
Қазіргі уақытта Екібастұз қаласы әкімдігі аталған видеоға және әлеуметтік желіде тараған сын-пікірлерге қатысты ресми түсініктеме берген жоқ.
