Қазақстан алдағы бір жылда жасанды интеллектке арналған ірі есептеу инфрақұрылымы қалыптасатын елдердің біріне айналуы мүмкін. NVIDIA негізін қалаушы Дженсен Хуанг Қазақстан мен Арменияны компанияның өңірдегі маңызды бағыттарының қатарында атап өтті, деп жазады Ozgeris.info.
Бұл туралы nFactorial School Арменияның Раздан қаласында Firebird компаниясының жасанды интеллект фабрикасының ашылуына қатысты жариялаған материалында мәлімдеді.
8 тамызда Разданда ТМД аумағындағы ең ірі AI-фабрикалардың бірі ашылды. Жоба NVIDIA DSX архитектурасы мен Dell серверлерінің негізінде іске асырылған. Нысанның құрылысына жарты жылдан астам уақыт кеткен.
Салтанатты шараға Армения премьер-министрі Никол Пашинян, АҚШ-тың Армениядағы уақытша сенімді өкілі, сондай-ақ Қазақстан Премьер-министрінің орынбасары – Жасанды интеллект және цифрлық даму министрі Жаслан Мәдиев қатысты.
Қазақстанда 125 МВт қуатқа арналған жоба жүзеге асырылмақ
NVIDIA негізін қалаушы Дженсен Хуанг шараға бейнебайланыс арқылы қатысып, сөзін бірден екі елге – Армения мен Қазақстанға сәлем жолдаудан бастаған. Жарияланған мәліметке сәйкес, алдағы 12 айда Firebird Армения мен Қазақстанда жасанды интеллектке арналған жалпы қуаты 250 МВт болатын инфрақұрылым қалыптастыруды жоспарлап отыр. Оның 125 МВт-ы Қазақстанға тиесілі болмақ. Қазақстандағы жоба Екібастұзда жүзеге асырылады.
Firebird «Қазақтелекоммен» бірлесіп, Data Center Valley есептеу инфрақұрылымын дамытуда. Жобаның қуаты 125 МВт болады. Сондай-ақ жоба АҚШ Сауда министрлігінің экспорттық рұқсатын алғаны айтылған.
Екібастұздың негізгі артықшылықтарының бірі – ауқымды есептеу орталықтарына қажет тұрақты әрі салыстырмалы түрде арзан электр энергиясының болуы. Өйткені ондаған мың графикалық процессордың үздіксіз жұмыс істеуі үшін орасан көлемде энергия қажет.
Армениядағы AI-фабрика 70 мыңнан астам GPU-ға дейін ұлғаймақ
Firebird-тің Армениядағы жобасының алғашқы кезеңінде 6 144 NVIDIA B200 үдеткіші іске қосылып, қуаты 15 МВт-қа жеткен. Компания 2027 жылдың соңына қарай инфрақұрылымды 70 мыңнан астам GPU-ға және 300 МВт қуатқа дейін кеңейтуді көздеп отыр.
Жобаның алғашқы тапсырыс берушілерінің бірі – Perplexity компаниясы.
Бұл бастамалар жасанды интеллект дәуірінде есептеу қуатының стратегиялық маңызы артып келе жатқанын көрсетеді. Бұған дейін дата-орталықтар мен GPU инфрақұрылымы негізінен технологиялық сервистердің бір бөлігі ретінде қарастырылса, қазір олар энергетика және көлік инфрақұрылымы секілді ұлттық маңызы бар ресурсқа айналып келеді.
Алайда қуатты серверлердің болуы өздігінен жеткіліксіз. Жасанды интеллект инфрақұрылымының экономикалық тиімділігі оны нақты өнімдер мен технологиялық шешімдер жасауға пайдалана алатын мамандар мен компанияларға тікелей байланысты.
