Қазақстандық боксшы Мейірім Нұрсұлтановтың WBC тұжырымы бойынша чемпиондық белбеу үшін жұдырықтасуы тағы да белгісіздікке тап болды. Ұйым орта салмақтағы чемпион Карлос Адамеске кезекті рет жеңілдік берген көрінеді, деп хабарлайды Ozgeris.info
EverythingBoxing әлеуметтік желісінің мәліметінше, доминикандық боксшы қараша немесе желтоқсан айында титулын бәске тікпей жекпе-жек өткізгісі келеді. WBC президенті Маурисио Сулейман бұл өтінішті мақұлдаған.
Шарт бойынша, Адамес алдағы кездесуде жеңілсе, чемпиондық белбеуінен айырылады. Ал жеңіске жеткен жағдайда Мейірім Нұрсұлтановпен жұдырықтасуға міндетті. Бұл айқастың жеңімпазы кейін Хесус Рамос кішімен кездесуі тиіс.
Алайда мұндай шешім қазақстандық боксшының жоспарына кері әсер етуі мүмкін. Нұрсұлтанов соңғы жекпе-жегін 2023 жылғы 17 қарашада өткізген. Егер жағдай тағы созылса, оның рингке оралуы 2027 жылға дейін шегерілуі ықтимал.
Ұзақ уақыт бойы жекпе-жек өткізбеген боксшының спорттық бабын сақтауы оңай емес. Сондықтан Мейірімнің чемпиондық мүмкіндікке қол жеткізуі ғана емес, рингке уақытылы оралуы да маңызды.
WBC-нің Адамеске қайта-қайта жеңілдік беруі бокс жанкүйерлерінің наразылығын тудыруы мүмкін. Ал қазақстандық боксшы үшін әрбір жоғалған айдың маңызы зор. Енді Мейірім Нұрсұлтановтың көптен күткен титулдық жекпе-жегі қашан өтетіні басты сұрақ болып отыр.
