Қытайлық стример Чэнь Цзыи, әлеуметтік желіде Ganfan Yingying деген лақап атпен танымал болған, 17 тамызда 24 жасында қайтыс болды. Оның қазасы туралы ата-анасы 4 қыркүйекте жариялаған некролог арқылы хабарлаған, деп хабарлайды Ozgeris.info.
Ақпарат көздерінің мәліметінше, стримердің өліміне қандағы калий деңгейінің қауіпті дәрежеге дейін төмендеуінен болған жүректің тоқтауы себеп болған. Бұл жағдай медицинада гипокалиемия деп аталады.
Қайтыс боларынан үш күн бұрын, 14 тамызда Yingying өзінің соңғы видеосын жариялаған. Кадрларда оның қолында тамыр арқылы дәрі енгізуге байланысты іздер көрінеді. Стример қандағы калий мөлшері 2,3–2,5 ммоль/л-ге дейін төмендегенін айтқан. Қалыпты көрсеткіш шамамен 3,5–5,5 ммоль/л.
Оның айтуынша, бұған бірнеше жыл бойы тікелей эфир кезінде шамадан тыс тамақтануы, түсірілімнен кейін әдейі құсу әдеті және дене бітімін сақтау үшін іш жүргізетін дәрілерді қолдануы әсер еткен.
Дәрігерлердің түсіндіруінше, жиі құсу кезінде ағза тағаммен бірге калий секілді маңызды электролиттерді де жоғалтады. Калийдің қатты төмендеуі жүрек ырғағының бұзылуына, ал ауыр жағдайда жүректің тоқтауына әкелуі мүмкін.
Стример эфирлерінің бірінде консервіленген жұмыртқаларды жарнамалай отырып, бірден 60–70 дана жеген.
Өзінің соңғы үндеуінде ол оқырмандарына: «Ақша табу маңызды, бірақ денсаулық әрқашан бірінші орында болуы керек», деген ескерту қалдырған. Үш күннен кейін стример қайтыс болды.
7 қыркүйек кешке қысқа видео платформалары Yingying-тің аккаунттарын өшірді.
Стримердің өлімі Қытайда экстремалды мукбанг контентінің қаупі мен осындай контент жасаушыларға түсетін қысым туралы пікірталасты қайта жандандырды.
