Қазақстан Республикасының Ішкі істер министрлігі «Қазақмыс корпорациясы» ЖШС-нің стратегиялық нысандарындағы қылмыстық схемалардың жолын кесу бойынша ауқымды арнайы операция өткізді. Өткен жылдан бері Ұлытау облысында қала құраушы кәсіпорында жүйелі түрде ұрлықпен айналысқан ұйымдасқан топтардың тұтас желісі сәтті жойылды, деп хабарлайды ozgeris.info сайты azh.kz ке сілтеп
ІІМ Ұйымдасқан қылмысқа қарсы күрес департаментінің өкілі Қуандық Алпыстың айтуынша, ведомство еліміздегі ірі кәсіпорындардың экономикалық қауіпсіздігін қорғауды ерекше бақылауда ұстайды. Полицейлердің жедел жұмысының арқасында келтірілген жалпы шығынның 94,5 пайызын өндіріп алу мүмкін болды.
Тергеушілер жергілікті криминалитеттің тікелей басшылығымен әрі қалқалауымен әрекет еткен қылмыстық топтың атышулы ісін сотқа сәтті жеткізді.
Бұл ҰҚТ мүшелері құрамында бағалы металдардың жоғары концентрациясы бар кен қорытпаларын жымқырудың өте күрделі схемасын әзірлеп, іске қосқан. Тек 2026 жылдың басынан бері жедел уәкілдер корпорацияға орасан зор қаржылық зиян келтіруі мүмкін төрт ірі ұрлықтың жолын кесті.
Кезекті сәтті операция 7 мамыр күні Мемлекеттік күзет қызметімен (МКҚ) бірлесіп өткізілді. Бұл жолы құқық қорғаушылар жанар-жағармай материалдарын ұрлаудың ауқымды схемасын әшкереледі.
Тінту және ұстау шаралары барысында күдіктілерден қомақты арсенал мен заттай айғақтар тәркіленді:
Ұрланған 1 тоннадан астам жанармай;
Қомақты көлемдегі қолма-қол ақша;
Ұрланған заттарды тасымалдауға қолданылған көлік құралдары;
Атыс қаруы мен оқ-дәрілер.
«Тергеу барысында ұрлық арнайы техникаға жалған жанармай құю және құжаттарды қолдан жасау арқылы жүзеге асырылғаны анықталды. Сонымен қатар, күзет құрылымдарының жекелеген қызметкерлері тарапынан жәрдемдесу фактілері әшкереленді», — деп атап өтті Қуандық Алпыс.
Қазіргі уақытта тергеу шаралары жалғасуда. Полиция тәркіленген барлық қаржылық құжаттамаға егжей-тегжейлі талдау жүргізіп жатыр. Сарапшылардың алдын ала бағалауы бойынша, келтірілген шығынның жалпы сомасы аса ірі мөлшерде деп саралануы мүмкін.
