Қазақстанда жаңа Конституцияны кеңінен насихаттау және қолжетімді ету жұмыстары күшейтіледі. Құжатты жаппай таратып, цифрлық платформаларға орналастыру және білім беру жүйесіне енгізу жоспарланып отыр.
Бұл туралы Үкімет отырысында премьер-министр Олжас Бектенов тиісті мемлекеттік органдарға нақты тапсырмалар берді.
Үкімет басшысы жаңа Конституция елдің тұрақты дамуына негіз болатын басты құжат екенін атап өтті. Осыған байланысты оның нормаларын халыққа кеңінен түсіндіру жұмыстары жалғасуы тиіс.
Мәдениет және ақпарат министрлігіне бір апта ішінде ақпараттық-насихат жұмысының жоспарын әзірлеу тапсырылды. Сонымен қатар, 2026 жылғы 10 сәуірге дейін Конституцияны жаппай тиражбен шығарып, мемлекеттік органдарға, білім және мәдениет ұйымдарына, кітапханалар мен сауда нүктелеріне тарату міндеті қойылды.
Құжаттың цифрлық қолжетімділігіне де ерекше назар аударылмақ. Цифрлық даму министрлігіне Конституция мәтінін барлық ашық электрондық платформаларға орналастыру тапсырылды.
Бұдан бөлек, Конституция нормаларын білім беру жүйесіне енгізу жоспарланып отыр. Мектептерде, колледждерде және жоғары оқу орындарында арнайы сабақтар өткізу көзделген. Осы мақсатта тиісті министрліктер 20 сәуірге дейін әдістемелік ұсынымдар мен оқу материалдарын әзірлеуі тиіс.
Жалпы алғанда, бұл шаралар Конституцияны тек құқықтық құжат ретінде емес, қоғамның құқықтық мәдениетін арттыратын маңызды құрал ретінде қалыптастыруға бағытталған.
