Даниялық боксшы Якоб Бэнк қазақстандық Жәнібек Әлімханұлымен өтетін алдағы жекпе-жекке қатысты пікір білдірді. Ол мансабындағы ең маңызды кездесудің туған елінде ұйымдастырылатынына қуанышты екенін айтып, жекпе-жекке дайындалуға уақыт жеткілікті болатынын атап өтті, деп хабарлайды Ozgeris.info
Жекпе-жек 2027 жылдың қаңтарында Дания астанасы Копенгагенде өтеді деп жоспарланған. Қарсыластар екінші орта салмақтағы WBO нұсқасы бойынша бос тұрған әлем чемпионы атағын сарапқа салады.
«Жекпе-жектің қаңтарда өтетініне қуаныштымын. Менің екі кішкентай балам және үлкен командам бар. Сондықтан көптеген мәселені алдын ала келісіп алу қажет. Қазір соның бәрін реттеуге уақыт жеткілікті. Бұған қоса, жаттығу жиынын өткізіп, жекпе-жектің жарнамасына көңіл бөлуге және, үміттенемін, көп билет сатуға мүмкіндік болады. Бұл – өте жақсы жаңалық», – деді Якоб Бэнк TV Syd телеарнасына берген сұхбатында.
Дат боксшысы келіссөздердің аяқталып, кездесудің нақты белгіленгеніне де тоқталды. Оның айтуынша, соңғы апталарда жекпе-жектің өтетініне қатысты белгісіздік сақталып, ол шешімді асыға күткен.
«Кеше келіссөздердің соңғы күні болды. Сондықтан біраз уақыттан бері алаңдаулы күйде күттім. Бокста ештеңеге толық сенімді бола алмайсың. Бірақ кеше кешке маған барлық мәселенің келісілгенін хабарлады. Бұл – мансабымдағы ең үлкен жекпе-жек әрі осы уақытқа дейін алатын ең жоғары гонорарым. Ақша мен үшін ешқашан басты мәселе болған емес. Бұл кездесуге қатысты ішкі сезімім әлдеқайда маңызды. Жекпе-жектің Данияда өтетініне сену қиын», – деді Бэнк.
Әлімханұлы жаңа чемпиондық белбеуге таласады
Жәнібек Әлімханұлы (17-0, 12 КО) бұған дейін орта салмақта өнер көрсетіп, WBO нұсқасы бойынша чемпиондық белбеуге ие болған. Алайда жазда ол салмақ дәрежесін өзгертіп, орта салмақтағы чемпиондық титулын босатты. Қыркүйектің басында қазақстандық боксшы екінші орта салмақтағы WBO рейтингінде бірінші орынға көтерілді.
Енді Әлімханұлы бос тұрған әлем чемпионы атағы үшін Якоб Бэнкпен қолғап түйістіреді. Бұл жекпе-жек қазақстандық боксшыға жаңа салмақ дәрежесінде чемпиондық белбеуді иеленуге мүмкіндік береді. Жәнібек соңғы рет 2025 жылдың сәуірінде Астанада шаршы алаңға шықты. Сол кездесуде ол тегі конголық француз боксшысы Анауэль Нгамиссенгені нокаутқа түсірген еді.
Бэнкті мансабындағы ең маңызды сынақ күтіп тұр
Якоб Бэнк (20-0, 11 КО) кәсіпқой бокста әлі жеңіліп көрмеген. Ол соңғы жекпе-жегін 2026 жылғы 25 шілдеде Сауд Арабиясының Жидда қаласында өткізіп, британдық Павел Августыникті жеңді. Енді дат боксшысы өз мансабындағы ең маңызды кездесулердің бірінде Жәнібек Әлімханұлымен күш сынасады. Қаңтар айында Копенгагенде өтеді деп жоспарланған жекпе-жекте WBO нұсқасы бойынша екінші орта салмақтағы әлем чемпионы анықталмақ. Қазақстандық жанкүйерлер үшін бұл кездесу Әлімханұлының жаңа салмақтағы мүмкіндіктерін бағалауға жол ашады. Ал Бэнк үшін туған елінде әлем чемпионы атағына таласу – кәсіпқой мансабындағы ерекше белес болмақ.
