Ұлттық Олимпиада комитетінің басшысы Италияда өтіп жатқан қысқы Олимпиада ойындарында танымал тұлғалармен және шетелдік әріптестерімен кездесті, деп хабарлайды Ozgeris.info сайты.
Қазақстанның Ұлттық Олимпиада комитетінің төрағасы Геннадий Головкин Италиядағы жиырма бесінші қысқы Олимпиада ойындары барысында актер Джеки Чанмен жүздесті. Ол өнер иесіне құрмет көрсетіп, қазақтың ұлттық шапанын жауып, тақия сыйлады.
«Біздің дәуірдің аңызы – Джеки Чанмен кездесу», – деді Головкин өзінің әлеуметтік желідегі парақшасында.
71 жастағы Джеки Чан Милан мен Кортина-д’Ампеццо қалаларында өтіп жатқан Олимпиаданың алауын жағу эстафетасына өткен жылдың 22 желтоқсанында Помпей қаласында қатысқан болатын. Осы спорттық іс-шаралар аясында Милан қаласында Қазақстан мен Қытайдың Ұлттық Олимпиада комитеттерінің басшылары бас қосып, екіжақты қарым-қатынас пен Азия аймағындағы ынтымақтастықты дамыту мәселелерін талқылады. Қазақстан тарапынан ұйым президенті Геннадий Головкин мен бас хатшы Әлімжан Ақаев барса, Қытай делегациясын Гао Чжидан мен У Цзянь бастап келді. Тараптар әйелдер боксы мен суға секіру спорты бойынша бірлескен оқу-жаттығу жиындарын өткізуге келісті.
Кездесу барысында Қытай өкілдері қазақстандық спортшылардың халықаралық жарыстардағы жетістіктеріне назар аударып, мәнерлеп сырғанаудан Олимпиада алтынын жеңіп алған Михаил Шайдоровтың нәтижесін ерекше атап өтті. Сонымен қатар олар Алматы қаласының 2029 жылғы Азия қысқы ойындарын өткізу құқығын жеңіп алуымен құттықтап, аймақтың географиялық ыңғайлылығын тілге тиек етті. Қазақстан бұл эстафетаны Харбин қаласынан қабылдап алды және бұл шешім Азия спорт қауымдастығының үлкен сенімін білдіреді. Жиын соңында екі елдің өкілдері спортшыларды дайындау бағытындағы бірлескен бастамаларды жүзеге асыруға дайын екендіктерін мәлімдеді.
