Лондондық «Челси» клубы қазақстандық шабуылшы Дастан Сатпаевтың Чемпионшиптегі кезекті матчқа қатысуына рұқсат бермеген, деп хабарлайды Ozgeris.info.
«Бернли» клубының бас бапкері Ники Хайеннің айтуынша, «Чарльтон Атлетикке» қарсы ойын алдында «Челси» клубы өз иелігіндегі жас футболшының алаңға шығуына қарсы болған. 18 жастағы отандасымыз Дастан Сатпаев бұған дейін санның артқы бұлшықетінің жарақатына байланысты бес аптаға жуық уақыт бойы ойындарға қатыса алмады. Қазақстандық шабуылшы алаңға тек 10 қазанда «Уотфордқа» қарсы кездесуде оралып, матчтың соңғы минуттарында ойынға қосылған болатын.
Қазіргі уақытта футболшының оңалту процесін «Бернли» дәрігерлері мен «Челсидің» медициналық штабы бірлесіп бақылап отыр. Лондондық клубтың мұндай шешім қабылдауына шабуылшының жарақаттан кейін толық қалпына келіп үлгермеуі себеп болуы мүмкін. Мамандар үш күннен кейін қайтадан алаңға шығу жас футболшының денсаулығына қосымша қауіп төндіреді деп есептеген болуы ықтимал.
Сатпаевтың қатысуынсыз өткен кездесуде «Бернли» «Чарльтон Атлетикпен» 2:2 есебімен тең түсті. Бұл ойын Чемпионшиптің 10-тур аясында өтті. Ал келесі турда «Бернли» өз алаңында «Вулверхэмптонды» қабылдайды. Кездесу 17 қазан күні Қазақстан уақытымен сағат 00:00-де басталады.
Қазақстандық футбол жанкүйерлері үшін Дастан Сатпаевтың алаңға қашан толық оралатыны маңызды мәселелердің бірі болып отыр. Оның алдағы матчтарға қатысуы медициналық штабтың қорытындысына байланысты болмақ.
