Ұлыбритания астанасында өткен кешегі сайлау қазақстандықтар үшін айтарлықтай жаңалықпен есте қалды. 7 мамыр күні Лондонның Сент-Джеймс ауданында дауыс беру қорытындысы жарияланып, Қазақстан тумасы Санжар Әбішев мэр лауазымына ие болды. Ол саяси додаға елдегі беделді Консерваторлар партиясының атынан қатысып, сенімді жеңіске қол жеткізді деп хабарлайды ozgeris.info сайты ZTB ға сілтеп.
Жаңадан сайланған басшының өмір жолына үңілсек, оның Біріккен Корольдікпен байланысы ерте басталғанын байқаймыз. Санжар Әбішев мектеп қабырғасынан бастап осы елде тұрып келеді. Ол Англияның таңдаулы оқу орындарының бірі болып саналатын Malvern College-де білім нәрімен сусындаған. Еңбек жолын маркетинг саласындағы жергілікті компанияларда бастап, тәжірибе жинақтады.
Бүгінде ол кәсіпкерлікпен де айналысады. Осыдан он жылға жуық уақыт бұрын өз ісін бастаған ол "Blue Swallow Group" маркетинг агенттігін дамытып отыр. Оның компаниясы әлемдік деңгейдегі ірі брендтермен тығыз байланыс орнатқан. Сонымен қатар 2015 жылы қоғамдық мәселелерді шешуге бағытталған қайырымдылық ұйымын құрып, әлеуметтік жобаларға қолдау көрсетіп келеді.
Британ саясатына белсене араласуы оның кезекті жетістігі емес, жүйелі жұмысының жемісі. Санжар Әбішев соңғы жылдары қоғамдық қызметтің ортасында жүрді. Ол 2024 жылы аталған аудандағы Консерваторлар партиясының жергілікті бөлімшесіне жетекшілік етіп, өңірді дамытуға үлес қосты. Енді ол мэр ретінде ауданның тыныс-тіршілігін жақсартумен айналыспақ.
