Баланыңызды оқытуға ақшаны қайдан алса болады?

Баланың білім алуы үшін ақша жинау – ата-ананың басты міндеттерінің бірі. Бірақ енді Қазақстанда мемлекет бұл міндетті жеңілдетуге дайын. «Келешек» бағдарламасы – баланың білім алуына алғашқы капиталды мемлекет есебінен бастауға мүмкіндік береді. Жай ғана қолдау емес, бұл – болашаққа салынған нақты инвестиция. Бұл туралы «Отбасы банкінің» баспасөз қызметі  хабарлады, деп жазады Ozgeris.info.

«Келешек» бағдарламасы арқылы мемлекет баланың білім алуына алғашқы капиталды салады. Жетім балалар мен ата-анасының қамқорлығынсыз қалған балалар үшін бастапқы капитал – 471 840 теңге. Ал қалған балалар үшін – 235 920 теңге. Бұл қаражат баланың атына ашылған арнайы жинақтау шотына түседі. «Келешек» бағдарламасына қатысу үшін ата-анаға «Отбасы банкінде» арнайы «AQYL» білім беру жинақтау салымын ашу қажет. Бұл шотты ашу үшін бірнеше қарапайым қадам бар: • Онлайн: Otbasybank.kz сайтына кіріп, «Менің банкім» бөлімінде «Депозиттер» арқылы «AQYL» депозитін ашу. • Мобильді қосымша: Otbasy bank мобильді қосымшасында «Жаңа депозит ашу» батырмасын басып, «AQYL» таңдаңыз. • Банк бөлімшесінде: Жақын жердегі Отбасы банк бөлімшесіне барып, кеңесшілердің көмегімен шот ашыңыз. • Кеңесшінің көмегімен: Өз қалаңыздағы кеңесшіні таңдап, онлайн консультация алыңыз. Шарттар мен талаптар: Бастапқы капиталды сақтау үшін не істеу керек? Жинақталған қаржыны сақтау үшін ата-ана жыл сайын белгілі бір соманы шотқа қосып отыруы керек: • Жалпы балалар үшін: Жылына кемінде 94 368 теңге жинақталуы тиіс. • Халықтың әлеуметтік осал топтарындағы балалар үшін: 47 184 теңге жеткілікті. • Жетім балалар үшін бұл талап қойылмайды. «AQYL» депозитіне мемлекет жыл сайын 5% сыйлықақы қосып отырады. Ал жетім балалар, ата-анасының қамқорлығынсыз қалған балалар, көп балалы және аз қамтылған отбасылардан шыққан балалар үшін бұл сыйлықақы мөлшері 7%-ға дейін жетеді. Егер шотқа жыл ішінде қажетті сома жиналмаса, мемлекет салған бастапқы капитал бюджетке қайтарылады. Жинақталған ақшаны қайда жұмсауға болады?• Қазақстандағы немесе шетелдегі колледж, университет ақысын төлеуге. • Егер бала мемлекеттік грант иегері атанса, жиналған қаражатты үй сатып алуға немесе туыстарының оқуына аударуға. • Магистратура немесе докторантура үшін төлем ретінде пайдалануға. Егер бала грант иегері атанса, шотта жиналған қаражат қайда кетеді? Бала диплом алғаннан кейін депозиттегі барлық қаржыны өзіне немесе жақындарына бере алады. Сонымен қатар бұл ақшаны үй сатып алу немесе магистратурада оқу үшін де қолдануға болады. Бұл ақпаратты «Отбасы банкінің» баспасөз қызметі ресми түрде мәлімдеді.