Журналист Руслан Өтепбайға сұхбат берген он жеті жастағы бойжеткеннің тағдыры жаңа арнаға бұрылды. Сәуір айында басталған қылмыстық іс барысында көптеген кедергілер кездескен еді. Бұл істі Әуезов ауданының прокуратурасы бірнеше мәрте қысқартып тастаған. Алайда бұқаралық ақпарат құралдарына шыққан жарияланымнан кейін жағдай түбегейлі өзгерді. Қазіргі таңда күдікті ретінде танылған жәбірленушінің сыныптасы екі айға тергеу изоляторына қамалды, деп хабарлайды ozgeris.info сайты.
Тергеу жұмыстары өз мәресіне таяп қалды. Жақын күндері барлық құжаттар сотқа жолданып түпкілікті үкім шығарылады. Осы уақыт аралығында абақтыда отырған баланың ата-анасы бойжеткеннің отбасына күн сайын келіп жүр. Олар кешірім сұрап қана қоймай екі жасты үйлендіру туралы ұсыныс тастаған. Бұған қоса мал және қомақты қаражат бермек ниеттерін білдірген. Тіпті жасырын түсірілген видеодан "келісейік, бәрібір сотталады, жазасы жеңілдеу болсын" деген сөздерді байқауға болады. Жәбірленуші тарапқа ұсынылған сома отыз миллион теңгеге дейін жеткен.
Күдіктінің ата-анасы бұған дейін берген сұхбатында қыздың басты мақсаты ақша өндіріп алу деген ой білдірген. Олар жәбірленушіге тек қаражат пен айыпты адам керек болды деп есептейді. Бірақ он жеті жастағы қыз бұл пікірді үзілді-кесілді жоққа шығарды. Ол өзіне ешқандай миллиондардың керегі жоқтығын кесіп айтты. Оның жалғыз талабы заң бұзған азаматтың тиісті жазасын алуы. Өйткені бұл жағдай бойжеткеннің абыройын төгіп намысын аяқ асты еткен. Ендігі қалғаны қылмыскердің өз әрекетіне заң алдында толық жауап беруі.
