Тұңғыш Президенттің жиені Нұралы Әлиев Instagram-дағы парақшасында, марқұм әкесі Рахат Әлиев туралы жазба жариялады, деп хабарлайды ozgeris.info.
«Соңғы күндері әкем, марқұм Рахат Әлиев туралы көп жылы сөздер естіп жатырмын. Бұл бекер емес. Дәл оның Қазақстан футбол федерациясын басқарған кезінде, 2002 жылдың 25 сәуірінде еліміз Азия конфедерациясынан шығып, ресми түрде UEFA-ға мүше болды.
Мен әлі күнге дейін Стокгольмде Мишель Платинимен өткен келіссөздерді және оның 2005 жылы Алматыға алғаш рет келгенін жақсы есімде сақтаймын. Ол кезде бәрі енді басталып жатқан еді…
Ал кеше мен Алматыдағы орталық стадионда Чемпиондар лигасының матчын тамашаладым: біздің «Қайрат» клубымыз UEFA-дағы ең атақты клуб — мадридтік «Реалға» қарсы шықты. Мұның бәрі — АЛМАТЫДА!
Сол сәтте мен бұл шешімнің қаншалықты стратегиялық болғанын шын мәнінде сезіндім. Жылдар өте келе ол өз жемісін беріп жатыр.
Мен мақтанамын! Барша алматылықтарды, күллі қазақстандықтарды және, әрине, «Қайрат» футбол клубын осы тарихи сәтпен құттықтаймын!», - деп жазды ол.
