Айзат Жұманованың өлімі: Күйеуіне шығарылған үкім өзгеріссіз қалды

Талдықорғанда 32 жастағы Айзат Жұманованың өліміне қатысты қылмыстық іс бойынша апелляциялық сот шешім қабылдады. Сот алқасы бірінші инстанция тағайындаған 14 жылға бас бостандығынан айыру жазасын өзгеріссіз қалдырды, деп хабарлайды  Ozgeris.info сайты. 

Іс Жетісу облыстық сотының апелляциялық алқасында қаралды. Жәбірленуші тарап айыпталушы Айбар Жанболаттың әрекетін Қылмыстық кодекстің 99-бабы 2-бөлігі бойынша қайта саралауды талап етті. Ал қорғаушы тарап, керісінше, жазаны жеңілдетуді сұраған. Қорғаушы Жанат Сарқытовтың айтуынша, сотталушының әрекетін Қылмыстық кодекстің 106-бабы 3-бөлігіне ауыстыру ұсынылған, өйткені өлім абайсызда болған деген уәж айтылған.

Алайда сот отырысына төрағалық еткен Айдын Жұрханов апелляциялық сатыда іс қосымша тергеуге қайтарылмайтынын және қарау тек тағылған айып шеңберінде жүргізілетінін атап өтті. Нәтижесінде сот алқасы іс материалдары Қылмыстық кодекстің 99-бабына толық сәйкес келеді деген қорытындыға келген.

Сот бұл бап бойынша 7 жылдан 15 жылға дейін бас бостандығынан айыру жазасы қарастырылатынын ескерді. Айыпталушының бұрын сотталмағаны назарға алынғанымен, оған берілген 14 жылдық жаза өзгеріссіз қалдырылды. Сондай-ақ жәбірленуші тарапқа моральдық өтемақы өндіру туралы шешім де сақталды.

Айта кетейік, қайғылы оқиға 2025 жылдың маусым айында Жетісу облысы Ақсу ауданына қарасты Баласаз ауылында болған. Айзат Жұманованың өліміне байланысты оның күйеуі Айбар Жанболат күдікті ретінде ұсталып, қамауға алынған. Марқұмның туыстары оның 2 жасар қызының көз алдында соққыға жығылып, кейін сыртқа шығарылып, атқа байланып сүйрелгенін айтқан.